“Doza e dytë e vaksinës anti-Covid, e garantuar”- Eksperët e ISHP: Plani për ditët në vijim, fillimisht do vijohet me numër të ulët vaksinimesh

Ekspertët e Institutit të Shëndetit Publik garantojnë se çdokush që mori dozën e parë të vaksinës kundër COVID-19, do të vaksinohet edhe me dozën e dytë në mënyrë që të fitojnë imunitetin e nevojshëm. Referuar planit për ardhjen e dozave të tjera në ditët në vijim, ekspertja  në Sektorin e Programit të Vaksinimit, pranë Institutit e Shëndetit Publik Iria Preza thotë se nuk do të krijohen mungesa vaksinash në këtë drejtim.

Preza bën me dije dhe planin e vaksinimit në ditët në vijim, duke theksuar se do të vazhdohet me një numër të vogël. Për t’u zgjeruar gradualisht me ardhjen e  dozave të tjera.  Po ashtu, ekspertja e ISHP-së flet edhe për nisjen e  vaksinimit në Qendrat Rezidenciale të të Moshuarve, ndërsa shton se plani nuk përfshin vaksinimin e personelit shëndetësor në institucionet shëndetësore private.

Në ditën e dytë të vaksinimit kundër COVID-19 janë vaksinuar 60 vetë, ndërkohë që gjatë një inspektimi të kryeministrit Edi Rama pranë qendrës së ngritur në stadiumin “Air Albania”, shefja e departamentit të kontrollit të sëmundjeve infektive, në ISHP, Silva Bino deklaroi se në këtë qendër mund të kryhen 600 vaksinime në ditë.

Ola Mitre/ SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.