Doza e tretë në SHBA, vetëm me Pfizer – Fushata do të fillojë në fund të këtij muaji. Moderna pret miratimin

Shtetet e Bashkuara të Amerikës do të fillojnë fushatën e injektimit të dozës së tretë vetëm me vaksinat e Pfizer. Presidenti Joe Biden pritet të njoftojë fushatën, ku do të injektohen rreth 100 milionë doza të tjera.

Shtëpia e Bardhë pritet të ofrojë dozën e tretë, për personat që kanë marrë dy të parat, më vonë gjatë këtij muaji, vetëm me vaksinën e Pfizer, sipas një burimi të afërt me çështjen. Presidenti amerikan, Joe Biden, pritet të njoftojë fillimin e fushatës më 20 shtator, por përveç Pfizer prodhuesit e tjerë të vaksinave në SHBA po presin autorizimin nga autoritetet për dozën mbështetëse.

Një panel i ekspertëve që këshillojnë Administratën e Barnave dhe Ushqimeve pritet të takohen më 17 shtator për të diskutuar dozën shtesë të Pfizer. Ndërkohë, Dr. Anthony Fauci, këshilltari mjekësor i Biden, deklaroi se mesa duket informacioni i nevojshëm nga Moderna nuk do të jetë i disponueshëm në kohë, në mërnyrë që shpërndarja të fillonte me 20 shtator.

“Mund të ketë një vonesë prej disa javësh për vaksinën e Moderna”, deklaroi Fauci. Ndërkohë, Johnson & Johnson nuk ka kërkuar ende nga rregullatorët që të miratojnë një dozë përforcuese, ndërsa javën e kaluar njoftoi se ishte në bisedime me FDA mbi këtë çështje. Ndërkohë që rastet me variantin Delta po rriten, administrata e Biden shqetësohet se infektimet mes njerëzve që janë plotësisht të vaksinuar tregojnë se mbrojtja nga vaksina po zbehet.

Gjithsesi, plani i SHBA për të ofruar një dozë të tretë do të varet nga FDA, e cila do të vendosë nëse një dozë e mbështetëse për personat që kanë marrë dy të parat, është e sigurt dhe efektive.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.