Doza nxitëse për të gjithë të rriturit – Moderna aplikon tek FDA për dozën e tretë tek personat mbi 18 vjeç

Moderna deklaroi këtë javë se ka aplikuar tek Administrata e Barnave dhe Ushqimeve në SHBA për autorizim për dozën nxitëse të vaksinës së Covid-19 për të gjithë të rriturit në moshë 18-vjeç e sipër. Agjencia i ka dhënë dritën e gjelbër dozave të treta të vaksinës për njerëzit që kanë sistem imunitar të cënuar, ata në moshë 65-vjeç e sipër dhe për individët me rrezik të lartë të sëmundjes së ashpër, përfshirë ata që ekspozohen rregullisht ndaj virusit. Moderna po synon autorizim për dozën nxitëse prej 50 mikrogramë, me gjysmë kapacitet të vaksinës origjinale që jepet me 2 doza në 4 javë nga njëra – tjetra.

Kërkesa vjen 1 javë pasi Pfizer aplikoi për të njejtën gjë për dozën nxitëse të vaksinës që ka zhvilluar me partnerin gjerman BioNTech. Vendimi i Agjencisë për Pfizer pritet këtë javë, përpara se paneli i  Qendrës për Kontrollin dhe Parandalimin e Sëmundeve, të takohet të Premten për të diskutuar zgjerimin e grupeve të përshtatshme për dozat nxitëse.  Aksionet e Moderna u rritën me 5% në 246.16 dollarë, pas lajmërimit.

Ekspertët mendojnë se dozat nxitëse janë jetësore për reduktimin e Covid-19 në nivel endemik. Muajin e kaluar, rregullatori i barnave në BE miratoi vaksinën nxitëse të Moderna për të gjithë personat mbi 18-vjeç, të paktën 6 muaj pas dozës së dytë.  Megjithatë, rregullatorë në disa vende, përfshirë France, Kanada, Finlandë dhe Suedi, kanë ndërmarrë një qasje më strikte ndaj vaksinës së Moderna, prej shqetësimeve në lidhje me inflamacionin e zemrës, që ndikon të rinjtë.

Klevis Llaha / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.