DPT publikon bilancin për Korrikun – Mbi 6 mijë subjekte të kontrolluara, 40% e tyre në shkelje
Drejtoria e Përgjithshme e Tatimeve ka publikuar bilancin e zbatimit të planit të masave për sezonin turistik për muajin korrik. Nga të dhënat e raportuara nga DPT rezulton se janë kontrolluar 6 227 subjekte në të gjithë vendin, ku janë konstatuar në shkelje 2 415 ose 40% e tyre.
Mosregjistrim, moslëshim kuponi tatimor, mallra pa faturë si dhe punonjës të paregjistruar janë edhe shkeljet më frekuente të evidentuara gjatë kontrolleve të ushtruara. Lidhur me vlerën totale të shkeljeve, sipas DPT-së ajo kap vlerën e 89.9 milionë lekë.
Po ashtu, janë evidentuar 240 subjekte të paregjistruara, ndërsa janë konstatuar 366 tatimpagues me punonjës të padeklaruar, të cilët janë future në skemën e kontributeve shoqërore e shëndetësore.
Ndërkohë, sa i takon numrit të të punësuarve pranë Drejtorive Rajonale Tatimore, rezulton se gjatë kësaj periudhe një mujore janë punësuar 15 mijë punonjës në DRT Durrës, Vlorë, Sarandë e Shkodër.
Lidhur me edukimin dhe informimin e tatimpaguesve, nga të dhënat rezulton se 3 269 prej tyre ju adresua thirrja për korrektesë në zbatimin e legjislacionit tatimor.
Ndërkohë, 2200 tatimpagues janë përzgjedhur nga Administrata Tatimore për të përmirësuar vetëdeklarimin, ku 1100 prej tyre iu përgjigjën thirrjes pozitivisht.
G.D/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.