“Drama” e qumështit – Asnjë litër eksport në BE, Peleshi: Do rrisim standardet
Shqipëria nuk eksporton produkte qumështi në vendet e Bashkimit Europian. Megjithëse në vend operojnë rreth 30 kompani të përpunimit të qumështit dhe nënprodukteve të tij, duket se standardet e produktit final, nuk janë të përshtatshme për tregun europian për shkak të moscertifikimit të tyre dhe rregullave strikte që ka ky treg.
Aktualisht produktet shqiptare të bulmetit eksportohen vetëm në Kosovë dhe vlerat janë minimale. Për këtë arsye, Ministria e Bujqësisë i ka dhënë prioritet vendosjes së standardeve europiane edhe në këtë industri, për të hapur tregun e eksporteve.
Ministri i Bujqësisë dhe Zhvillimit Rural, Niko Peleshi gjatë vizitës në qarkun e Gjirokastrës, është ndalur dhe një stabiliment modern të përpunimit të qumështit dhe nënprodukteve të tij, ku bëri me dije se do të ketë një reformë të thellë në këtë sektor.
“Dua ta ritheksoj, në qoftë se, Shqipëria nuk arrin dot të hapë eksportet drejt vendeve të Bashkimit Evropian, kjo industri nuk mund të rritet. Fermeri shqiptar nuk mund të rritet sado subvencione t`i japim ne, sepse pa patur të garantuar shitjen, nuk investon për të rritur tufën e vet, bagëtinë e vet. Kështu, që sfida jonë, detyra jonë si Ministri, si institucione, si qeveri shqiptare është të ndërtojmë një sistem funksional sipas standardeve të Bashkimit Evropian, ta certifikojmë atë nga audituesit e Bashkimit Evropian. T`i japim mundësi eksporti dhe këtij sektori siç janë sektorët e tjerë, peshkimi, bujqësia që po ecin shumë mirë, në mënyrë që të kemi një bum, bazuar në një traditë të shkëlqyer, siç është zona e Gjirokastrës përshembull, për bagëtitë e imëta, që kanë cilësi fantastike të kërkuara nga gjithë tregu”, tha Peleshi.
Spas ministrit Peleshi gjithë politika që po ndiqet, qoftë me reformën por edhe mbështetjen me subvencione, do të çojë në garantimin e një tregu të konsoliduar dhe të hapje e sigurtë drejt Bashkimit Evropian.
“Në tregun shqiptar do të ketë vetëm prodhime që garantojnë siguri ushqimore, që garantojnë respektim të gjitha standardeve, sepse vetëm në këtë mënyrë edhe Bashkimi Evropian do të na njohë sistemin tonë të ngritur të sigurisë ushqimore. Do të na hapë dyert për eksport dhe kjo industri do të zhvillohet”, u shpreh ministri.
Eksportet blegtorale kanë vlerën më të ulët në zërin e eksporteve në bujqësi në rreth 6.8 milion euro. Aktualisht vendi ynë eksporton kryesisht, kafshë të gjalla, shpendë, vezë dhe mjaltë natyral ndërsa qumështi dhe nënproduktet e tij, gjatë 2017-ës janë regjistruar në vlerën e 490 milionë lekë.
Elisabeta Dosku/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.