Drejt ngritjes “Byroja e Kredisë” – Bankat kërkojnë akses në të dhënat e institucioneve publike
Bankat mund të marrin akses në informacionin që entet publike disponojnë rreth kompanive apo bizneseve, të cilat aplikojnë për kredi. Platforma për nxitjen e kreditimit, e përgatitur nga Banka e Shqipërisë dhe Shoqata Shqiptare e Bankave, mes të tjerash parashikon që bankat të kenë mundësi të zgjerojnë informacionin rreth huamarrësve, me qëllim lehtësimin e kreditimit të tyre. Bankat argumentojnë se informacioni i përditësuar, i qartë dhe lehtësisht i disponueshëm, është i rëndësishëm për analizën efektive të rrezikut të huamarrësit dhe lehtësimin e kredidhënies. Në këtë proces, është e rëndësishme të përmirësohet aksesi elektronik në bazat ekzistuese të të dhënave, si edhe mundësimi i ndërlidhjes së tyre me sistemet e vlerësimit të rrezikut të kredisë, që përdor ose që do të ndërtojë sektori bankar.
Aktualisht, informacioni mbi gjendjen e detyrimeve të huamarrësve mbështetet mbi Regjistri e Kredisë, që administrohet nga Banka e Shqipërisë. Megjithatë, pas krizës, është shtruar nevoja që informacioni rreth kredimarrësve të jetë më gjerë sesa gjendja dhe statusi i kredive që ata kanë në sistemin financiar. Një projekt i rëndësishëm që pritet ta pasurojë këtë informacion do të jetë edhe Byroja e Kredisë, që do të përmbajë të dhëna edhe rreth detyrimeve të tjera që huamarrësit potencialë mund të kenë. Me sa duket, aksesi në informacionin e disponuar nga entet publike do të jetë thelbësor për të ngritur një byro të dobishme të kredisë.
Shoqata e Bankave pritet të propozojë brenda tremujorit të vitit të ardhshëm një dokument, që do të përmbajë edhe propozimet konkrete për mënyrën dhe masën e aksesit në bazat e caktuara të të dhënave si, për shembull, atë të Zyrës së Regjistrimit të Pasurive të Paluajtshme, të sigurimeve shoqërore, të gjykatave, etj. Pjesë e dokumentit duhet të jenë edhe garancitë e nevojshme që informacioni i marrë do të ruhet dhe përdoret në përputhje me kërkesat ligjore.
Propozimi i bankave kërkon angazhim dhe koordinim mjaft të gjerë ndërinstitucional, ndaj realizimi i tij nuk pritet të jetë aspak i thjeshtë. Sidoqoftë, dokumenti duhet të përmbajë edhe sugjerimet konkrete për mënyrën sesi do të kryhet i gjithë procesi.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.