‘Drejt një qeverisje të përbashkët natyrore dhe kulturore për Liqenin e Ohrit”- BE dhe UNESCO organizojnë takimin 2 ditor në Pogradec, pjesëmarrës zyrtarë shqiptarë dhe maqedonas
Pritet të nisë nesër në Pogradec, takimi i 6-të i Platformës Ndërkufitare, i cili zhvillohet në kuadër të projektit: ‘Drejt një qeverisje të përbashkët natyrore dhe kulturore ndërkufitare në rajonin e Liqenit të Ohrit’.
Ky takim i gjashtë është pjesë e një iniciative të përbashkët të Bashkimit Evropian dhe UNESCO, në bashkëpunim të ngushtë me autoritetet shqiptare dhe maqedonase, për të forcuar bashkëpunimin ndërkufitar për menaxhimin e trashëgimisë natyrore dhe kulturore të rajonit në Liqenin e Ohrit. Në takimin, i cili do të mbahet më datë 14-15 shtator do të jenë pjesëmarrës përfaqësues të ministrive dhe institucioneve shqiptare dhe maqedonase.
“Qëllimi përfundimtar i këtij projekti në rrjedhën e sipërme është zgjerimi i emërtimit të Trashëgimisë Botërore, për të përfshirë pjesën shqiptare të rajonit të Liqenit të Ohrit. Projekti synon të arrijë këtë, duke forcuar bashkëpunimin ndërkufitar, duke përmirësuar kapacitetet për menaxhimin efektiv të trashëgimisë natyrore dhe kulturore, si dhe duke mbështetur planifikimin e menaxhimit të integruar.
Objektivat specifike të kësaj mbledhjeje të gjashtë përfshijnë identifikimin e nevojave shtesë të konsultimeve ndërkufitare dhe koordinimit për draft-dokumentit e nominimit të Trashëgimisë Botërore, duke dhënë një përditësim mbi progresin për finalizimin e dokumenteve, të planifikimit, të menaxhimit për pronën ekzistuese të Trashëgimisë Botërore”, thuhet në një njoftim të UNESCO.
Pronësia “Trashëgimia Natyrore dhe Kulturore e rajonit të Ohrit” fillimisht u regjistrua në listën e Trashëgimisë Botërore në vitin 1979 për vlerat e saj natyrore të shquara dhe u zgjerua një vit më vonë për të pasqyruar atributet e gjera kulturore të rajonit.
Si një nga liqenet më të vjetra të Evropës, Ohri “krenohet” me një histori mbresëlënëse gjeologjike dhe biologjike dhe është një vend i biodiversitetit të jashtëzakonshëm.
Zona përreth liqenit përmban mbetjet arkeologjike të disa vendbanimeve më të hershme të Evropës, si dhe manastiret sllave që datojnë nga shekulli i 9-të, duke e bërë trashëgiminë natyrore dhe kulturore të këtij rajoni vërtetë i shquar.
Osman Dedja/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.