Drejt përfundimit markata e peshkut në Shëngjin – Ministri Çuçi: Gati projektet edhe për dy të tjera (FOTO)
Markata e peshkut në Shëngjin, e para e këtij lloji që po ndërtohet në Shqipëri, është drejt përfundimit, ka bërë me dije ministri i Bujqësisë dhe Zhvillimit Rural, Bledi Çuçi gjatë inspektimit të punimeve së bashku me zv.ministrin, Roland Kristo. Në njoftim thuhet se investimi kap vlerën e rreth 60 milionë lekëve dhe është një financim i buxhetit të shtetit. Gjithashtu sipas ministrit, ndërtimi i kësaj markate do të sjell liberalizimin e tregut dhe rritje te zënieve dhe të cilësisë së peshkut.
“E filluam nga Shëngjini për të ndërtuar markatën e parë, por kemi planifikuar tre të tilla. Do të bëjmë gjithashtu Vlorën dhe Durrësin. Këtu do të aplikojmë edhe formën e parë elektronike të ankandit. Kjo markatë do të imponojë një organizim shumë të mirë të organizatës tuaj të peshkimit.”, tha ministri Çuçi.
Sipas tij, kjo lloj markate u mundëson prodhuesve (anijet e peshkimit) që pasi të sjellin produktet e tyre to, të kalojnë në procedura ankandi ku do të marrin pjesë në blerje tregtarë të mëdhenj edhe të vegjël.
Markata e Durrësit do të ristrukturohet së bashku me Organizatën e peshkimit dhe vitin e ardhshëm do të fillohen procedurat edhe për markatën e Sarandës, ka deklaruar ministri. Gjatë bashkëbisedimit me peshkatarët e Shëngjinit ministri foli edhe për një ndërhyrje që do të bëhet së shpejti tek porti, në mënyrë që peshkatarët të kenë të gjitha lehtësitë infrastrukturore për të punuar. Porti do të lirohet nga anijet e vjetra dhe mjetet motorike të sekuestruara që gjenden aty prej vitesh, si dhe do të ndërtohet një pasarelë e re, mbyllet njoftimi.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.