Drejtësia, ‘me xhepat plot’/ Programi i paraanëtarësimit i BE, 61 milionë euro për Shtetin e së Drejtës në Shqipëri për vitin 2020
Reforma në Drejtësi dhe lufta kundër korrupsionit e krimit të organizuar do të vijojnë të mbështeten fort nga Bashkimi Evropian për vitin 2020. Në programin e ri të instrumentit të asistencës së paraanëtarësimit (IPA II), të zbardhur nga Scan Televizion, është specifikuar fondi prej 61 milionë eurosh në kuadrin e Shtetit të së Drejtës. 19 milionë euro nga ky fond do të shkojnë në programe që kanë të bëjnë me luftën kundër krimit të organizuar dhe drogës, ndërsa 42 milionë euro për mbështetje të mëtejshme për Reformën në Drejtësi.
Përmes fondit 19 milionë euro do të synohet: i) përmirësimi i kapaciteteve të Policisë së Shtetit dhe Prokurorisë së Përgjithshme dhe agjencive përgjegjëse që merren me luftën kundër krimit të organizuar përfshirë trafikun e drogës dhe kultivimin e kanabisit; ii) përmirësimi i kapaciteteve të Ministrisë së Shëndetësisë dhe Mbrojtjes Sociale dhe të Institutit të Shëndetit Publik në analizimin e përdorimit të drogave. Masa do të mbështetë bashkitë e përzgjedhura në ofrimin e shërbimeve dhe mënyrave alternative të jetesës për komunitetet e cenuara ndaj kultivimit dhe trafikut të kanabisit.
Ndërkohë që fondi 42 milionë euro për Reformën në Drejtësi do ketë si objektiva specifike: forcimi i pavarësisë, transparencës, efikasitetit, llogaridhënies dhe besimit të publikut te sistemi i drejtësisë në Shqipëri në përputhje me standardet evropiane; dhe (ii) forcimi i mbrojtjes së të drejtave të njeriut në sistemin e vuajtjes së dënimit.
Lorenci Rabeta/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.