Drejtësia në “syrin” e të huajve – Hirsch për TV SCAN: Fund nepotizmit dhe zëvendësim të prokurorëve
Reforma në drejtësi në vendin tonë ka nxitur edhe reagimin e studiuesve dhe analistëve të huaj, të cilët e shohin si një sfidë të politikës por jo të parealizueshme. Në një intervistë për televizionin SCAN, Mario Hirsch, analist politik në Bruksel, e ka cilësuar si një hap rëndësishëm për integrimin e Shqipërisë. Por për këtë Hirsch theksoi se duhen ndërmarrë hapa konkretë, si zëvendësimi i të gjithë prokurorëve dhe gjyqtarëve, si edhe t’i jepet fund nepotizmit në strukturat shtetërore. Ai shprehu bindjen se Shqipëria dhe qeveria shqiptare do të arrijë ta përmbushë këtë nevojë për funksionimin e drejtësisë.
“Duhet bërë një lëvizje për zëvendësimin e të gjithë prokurorëve dhe gjyqtarëve, sikurse ndodhi edhe në Turqi. Vetëm kështu mund të funksionojë sistemi i drejtësisë. Një element tjetër që mund ta quaj problem është edhe nepotizmi, punësimi i kushërinjve dhe kushërinjve të kushërinjve në struktura shtetërore. Kjo duhet eliminuar, sepse është një ndër elementët që çon në mosfunksionimin e gjërave. Unë kam besimin që kryeministri juaj Edi Rama e ka forcën e duhur për ta bërë këtë hap të rëndësishëm. Ai mundet ta bëjë reformën në drejtësi”, u shpreh Hirsch.
Vetëm pak ditë më parë ndërkombëtarët hodhën kritika për një mungesë të frymës nga ana e qeverisë për realizimin e reformës në drejtësi, e cila sipas tyre duhet të ishte drejt përfundimit. Megjithatë duket se me inaugurimin e godinës ku do të punojnë komisionet kryesorë të rivlerësimit të gjyqtarëve e prokurorëve, rruga tashmë për zbatimin e reformës është hapur.
Nertila Doko/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.