Drejtësia, pagat disa milionëshe – Ligjet votojnë Buxhetin. Prokuroria “merr” 65 punonjës shtesë

Komisioni Parlamentar i Ligjeve ka miratuar të mërkurën nen për nen buxhetet e institucioneve të drejtësisë dhe të sigurisë, ku bien në sy pagat e reja të magjistratëve, të cilat nga 1 janari 2019 do të jenë shumë më të larta nga ajo e Presidentit të Republikës.

Pikat më te debatuara nga deputetët ishte refuzimi i kërkesës së Prokurorisë së Përgjithshme e cila nuk mori 197 punonjës së rinj shtesë, por vetëm 65. Gjykata Kushtetuese ishte institucioni tjetër të cilit ju refuzua shtesa e fondeve për punonjës të rinj dhe rikonstruksionin e ambienteve.

Komisioni i Shërbimit Civil do të marrë një shtesë prej 4 milionë lekësh për mbikëqyrjen e punonjësve të administratës gjatë vitit zgjedhor 2019, ndërkohë që u la e hapur mundësia që komsionerëve të tre organeve të Vetting-ut tu jepet një fond i posaçëm për sigurimin e jetës.

Komisioni Parlamentar i Ligjeve diskutoi edhe lidhur me fondin e pakushtëzuar për njësitë vendore, ku propozoi rritje të fondeve për bashkitë e zonave turistike, të cilat përballen me shtim të fluksit të vizitorëve deri 5 herë më shumë gjatë sezonit veror.

Lorenc Rabeta/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.