Drejtuesit e doganave, takim me sipërmarrjen turke! Diskutime për procedurat doganore për importet, çmimet e referencës e tarifat
Drejtues të lartë të doganave në Shqipëri pritën sot në takim përfaqësues të Dhomës së Tregtisë dhe Industrisë Shqiptaro-Turke, ku u diskutuan për përpjekjet që po bëhen për krijimin e një klime të favorshme për biznesin, lehtësimin e procedurave e forcimin e bashkëpunimit me sipërmarrjen.
Referuar njoftimit zyrtar të Drejtorisë së Përgjithshme të Doganave, përfaqësia e sipërmarrjes turke, e cila kryesohej nga kreu i Bordit të ATTSO, Seyhan Pencapligil, paraqiti një sërë problematikash me të cilat kjo sipërmarrje ndeshet gjatë aktivitetit në procedurat doganore. Problemet e ngritura gjatë këtij takimi ishin kryesisht mbi lehtësimin e procedurave doganore për mallra të ndryshme që importohen nga ky vend, çmimet e referencës dhe tarifat doganore.
“Zëvendësdrejtore e Përgjithshme e Doganave, znj.Mirela Meko si dhe drejtori i Procedurave doganore, Saimir Sinani, iu dhanë përgjigje gjithë kërkesave të bizneseve turke, duke i sqaruar për çdo procedurë apo risi mbi sistemin doganor shqiptar. Gjithashtu zonja Meko, informoi palën turke mbi ndryshimet rrënjësore që janë bërë në sistemin e vlerësimit doganor, por edhe në lehtësimin e shumë procedurave pas hyrjes në fuqi të Kodit të ri Doganor” njoftojnë Doganat.
“Takimet ballë për ballë me biznesin janë shumë frytdhënës dhe kanë një efektivitet më të madh për të dy palët”, theksoi gjatë këtij takimi znj. Meko, e cila e ftoi biznesin turk që zhvillon aktivitet ekonomik në Shqipëri, të jetë pjesë e trajnimeve që administrata doganore ofron për sipërmarrjen. Nga ana e saj pala turke vlerësoi progresin e bërë nga ana proceduriale në administratën doganore, si dhe klimën që është krijuar tashmë mes kësaj administrate dhe biznesit.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.