Dritan Mezini, në ‘’Argument’’: ‘Ka hapësirë për të gjithë ata që duan të punojnë- Ja cilat janë profesionet më të kërkuara
Për të diskutuar rreth faktit se si është të punosh në Shqipëri, pjesë e panelit të ‘’Argument’’ të enjten në mbrëmje ishte dhe Dritan Mezini,themeluesi i Duapune.com. Ai shprehet se tregu sot nuk është më i kënaqur vetëm me një diplomë, por kërkon dhe disa kualifikime të tjera.
‘’Duhet të theksojmë se ka hapësirë për të gjithë ata që duan të punojnë, por ne akoma nuk jemi të ndërgjegjshëm se të kesh një diplomë nuk është e mjaftueshme. Diploma është thjesht një kusht paraprak për të gjetur veten në treg.’’- shprehet Mezini.
Sipas themeluesit të Duapune.com , të rinjtë ende nuk janë të ndërgjegjshëm per sfidat e tregut. Ai thekson se puna sot kërkon kualifikime të njëpasnjëshme për të pasur një standard sa më të lartë.
‘’Problemi më i madh i të rinjve sot është vështirësia e prezantimit të vetes, që ata janë më të denjët për atë vend pune. Ndërsa përsa i përket informalitetit në punë, si një nga problemet më kryesore me të cilën hasen të rinjtë dhe jo vetëm, mendoj se është rritur ndjeshëm ndërgjegjshmëria e individëve në raport me mënyrën sesi ata e marrin pagën e tyre.”
Si një njohës mjaft i mirë i tregut të punës, kjo dhe për shkak të portalit që ai drejton, ku shumë individë arrijnë të kenë akses më lehtë në tregun e punës, Mezini theksoi se tregu ka nevojë shumë të lartë për specialistë në teknologji informacioni por dhe për ata që kanë mbaruar për ekonomik – marketing, të cilët janë tepër të aftë në shitje.
Elefteria Zguri/ SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.