Dublimi i KLSH, Meta kundër Kushtetueses – Auditimi financiar i Bashkive jo nga privatët, kompetencë e Kontrollit të Lartë të Shtetit
Ndërsa Gjykata Kushtetuese rrëzoi pretendimin e Kontrollit të Lartë të Shtetit, duke lënë në fuqi një nen të ligjit 68/2017 “Për financat e vetëqeverisjes vendore” që mundëson auditimin e bashkive nga subjekte private, Presidenti Ilir Meta shprehet se një veprim I tillë është antikushtetues pasi është një kompetencë ekskluzive e KLSH si institucioni më i lartë i kontrollit financiar në Republikën e Shqipërisë. Zyra e Presidentit I është drejtuar të martën Gjykatës Kushtetuese me një letër, ku thekson që Pavarësisht se audituesi i jashtëm ligjor është një profesion që liçensohet sipas ligjit, sërish është antikushtetuese që me ligj të barazohet roli, niveli dhe kompetencat e këtij profesioni me ato që Kushtetuta ia atribuon vetëm Kontrollit të Lartë të Shtetit, si institucioni më i lartë i kontrollit financiar në Republikën e Shqipërisë.
Në thelb, nënvizon Presidenca, dispozitat ligjore të kundërshtuara nga Kontrolli i Lartë i Shtetit, cenojnë pavarësinë funksionale dhe organizative të këtij organi, pasi nga zbatimi i tyre, lind detyrimi i KLSH-së për auditimin financiar çdo vit të të gjitha njësive të qeverisjes vendore, ç’ka është relatuar se bëhet praktikisht i pamundur për t`u përmbushur, duke i hapur kështu rrugë vetëkontrollit të pushtetit vendor nga auditues të jashtëm privatë.
Më tej kreu I shtetit akuzon se Vendosja e KLSH-së në një vështirësi të tillë për të përmbushur me cilësi detyrat e tij kushtetuese, krijon një situatë ku përmes një neni të ligjit, kufizohet veprimtaria kushtetuese e KLSH-së, për ta penguar atë që të kontrollojë mënyrën e përdorimit të fondeve publike nga njësitë e qeverisjes vendore.
Në letër, Presidenti I kërkon gjyqtarëve të Kushtetueses t’i përmbahen vetëm ligjit dhe të përmbushin, misionin dhe përgjegjësitë që Kushtetuta i ka dhënë, në mënyrë të pavarur, të pandikuar, me kurajo e përgjegjshmëri të plotë, duke u distancuar sa më shumë nga ndjesia personale e secilit anëtar. Në fund, Presidenca paralajmëron se atë që nuk e bëri Gjykata Kushtetuese do ta bëjë Kuvendi i ri që do dalë nga zgjedhjet e 25 prillit.
Lorenc Rabeta / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.