Duhen 1,3 trilionë dollarë investime shtesë në energji – JP Morgan: Kërkesa për naftë pritet të rritet rreth 10% deri në vitin 2030 dhe gazi 18%
Bota duhet të gjejë 1.3 trilion dollarë investime shtesë deri në vitin 2030 për të rritur të gjitha llojet e prodhimit të energjisë dhe infrastrukturës nga burimet e rinovueshme te nafta dhe gazi për të shmangur një krizë energjie, deklaroi banka amerikane JP Morgan në parashikimin e saj të parë vjetor të energjisë.
“Gjetja kryesore është se deri në vitin 2030, rritja e kërkesës për energji do të tejkalojë rritjen e ofertës me rreth 20% bazuar në tendencat aktuale, kryesisht të nxitura nga ekonomitë në zhvillim dhe përpjekjet e tyre për të zhvilluar dhe nxjerrë qytetarët e tyre nga varfëria”, thekson banka amerikane.
Investimi do të duhet të përfshijë të gjitha lëndët djegëse, si naftën dhe gazin, burimet e rinovueshme dhe bërthamore, me kërkesën për naftë që pritet të rritet me rreth 10% deri në vitin 2030 dhe gazi me 18%.
“Jo të gjitha karburantet janë të barabarta, dhe në pjesën më të madhe burime të ndryshme të energjisë nuk janë plotësisht të këmbyeshme. Panelet diellore nuk mund të zëvendësojnë naftën, të nevojshme për shembull në prodhimin industrial të kimikateve,” thuhet në opinionin e JP Morgan, për të cilin kontribuuan 30 analistë.
Hulumtimi është në kontrast me mesazhin e Agjencisë Ndërkombëtare të Energjisë (IEA), e cila vitin e kaluar tha se nuk nevojiteshin investime të reja në lëndët djegëse fosile. Që atëherë, IEA ka sqaruar se perspektiva e saj ishte vetëm një nga skenarët e sugjeruar dhe i bëri thirrje OPEC të nxirrte më shumë naftë në treg.
Sipas raportit, shpenzimet globale të përdorimit përfundimtar për energjinë do të rriteshin në 9.5% të PBB-së në vitin 2022 nga mesatarja 2015-2019 prej 8.4%. Një rritje e mëtejshme e kostove të energjisë do të shtonte mundësitë për trazira sociale dhe një ngadalësim të tranzicionit të energjisë, thekson JP Morgan.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.