Duka për ’60 minuta’ të Arbër Hitaj: Arben Malaj do të kandidojë me Partinë Agrare, në zgjedhjet e ardhshme nxjerrim deputetë në 8 qarqe”

Partitë e vogla, jashtë dhe brenda parlamentit, i kanë intensifikuar përpjekjet për të përfshirë në reformën zgjedhore kërkesat e tyre, si uljen e pragut elektoral, listat e hapura apo ndalimi i financimeve të partive nga shteti. Megjithatë, përpjekjet e tyre deri më tani nuk janë marrë parasysh. Për të folur më gjatë mbi kërkesat e partive të vogla dhe strategjinë që ato do të ndjekin në përmbushjen e tyre, studioja e “60 minuta” kishte të ftuar ditën e sotshme kryetarin e Partisë Agrare Ambientaliste, Agron Duka dhe kryetarin e Partisë Republikane, Fatmir Mediu.

Duka e ka hapur fjalën e tij duke thënë se kur opozita ka ditur të presionjë, Rama është tërhequr nga idetë e tij, sikurse është pranimi i identifikimit biometrik të votuesve, që është një arritje opozitare. “Faktori ndërkombëtar nuk mbështet Ramën, por është me popullin. Është detyra e opozitës të ngrejë frymën e saj në popullsi, dhe pastaj le të bëhen zgjedhjet dhe me Ramën”, është shprehur Z.Duka.

“Për shkak të keqqeverisjes gjatë këtyre viteve, unë jam shumë i sigurt që viti tjetër do të sjellë rotacion politik”. I pyetur nga moderatori Arbër Hitaj për alternativën opozitare, Z.Duka është shprehur se Basha është një alternativë e qenësishme, duke nënvizuar premtime të rëndësishme të tij, sikurse 100 milionë euro subvencione direkte në bujqësi dhe ulja e çmimit të naftës.

Për reformën zgjedhore, Z.Duka ka theksuar se nëse ajo dështon, atëherë ka dështuar dhe opozita dhe faktori ndërkombëtar. Megjithatë, ai është shprehur se miratimi i reformës zgjedhore në parlament është përgjegjësi e Ramës pasi ai i ka votat, por i mungon vullneti të bëjë diçka të mirë, pasi do të qeverisë si sulltan. “Dështimi i reformës do të jetë dhe dështimi i opozitës dhe i faktorëve ndërkombëtarë, pasi do ta lejojë Ramën të qeverisë si sulltan,” ka theksuar ai.

Në fund, duke folur për partinë që drejton dhe qëllimet e saj në zgjedhjet e ardhshme, Z.Duka ka theksuar se do tentojë të nxjerri deputetë në 8 qarqe, duke nisur nga Shkodra, Elbasani Durrësi dhe qytetet të tjera dhe ka njoftuar kandidatin më të ri në partinë e tij. “Në përfaqësojnë një kauzë që mbështet 45% të popullsisë së vendit, dhe ne përbëhemi nga njerëz intelektual me punë të rëndësishme që kanë ndihmuar komunitetin. Prurja jonë më e re në Partinë Agrare dhe Ambientaliste është Arben Malaj, që të gjithë ja dinë vlerat”, ka përfunduar Z.Duka.

D.B – SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.