Duke filluar nga data 1 janar 2020, të gjithë ashensorët duhet të jenë të markuar me certifikatën e sigurisë

Për të rritur sigurinë e qytetarëve, si dhe për të garantuar përputhjen e plotë me direktivat e BE-së, të gjithë ashensorët që do të hyjnë në tregun shqiptar duhet të jenë të markuar me certifikatën e sigurisë. Për këtë qëllim Inspektoriati Shtetëror i Mbikëqyrjes së tregut  zhvilloi një tryezë diskutimi me temë “ Roli i ndërtuesve, importuesve, instaluesve dhe trupave të autorizuar për sigurinë që ofrojnë ashensorët”, me aktorë të tregut privat dhe përfaqësues të organizatave civile që kanë në fokus mbrojtjen e konsumatorëve.

Kryeinspektori i ISHMT-së z.Lavdrim Sahitaj, gjatë fjalës së tij tha se legjislacioni shqiptar tashmë është përshtatur sipas direktivave të BE-së dhe për zbatimin e tij do të duhet të angazhohen të gjithë palët e interesit.

“ Në zbatim të legjislacionit, që tashmë është tërësisht i transpozuar për ashensorët e rinj që do të vendosen në shërbim nga data 1 janar 2020, lind detyrimi të kërkohet edhe kryerja e ekzaminimit të plotë fillestar për të gjithë ashensorët ekzistues. Ndaj roli juaj si aktorë të tregut është thelbësor në këtë proces, sikundër edhe përgjegjësitë që dalin prej tij”, ka theksuar z.Sahiti.

Ky aktivitet do të pasohet nga takime me grupet e tjera të interesit, siç janë administratorët dhe kryetarët e bashkive.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.