Duty Free/ Deklarata e fortë e ambasadës amerikane: Është zhgënjyese që klima aktuale e biznesit pengon rritjen e investimeve të huaja

Ambasada Amerikane në Tiranë ka reaguar për klimën e biznesit në Shqipëri duke i kërkuar qeverisë shqiptare që “të shqyrtojë seriozisht sfidat në mjedisin aktual dhe të zbatojë ndryshimet e prekshme për të tërhequr investimet e huaja shumë të nevojshme”.

Në deklaratën e shpërndarë për mediat,ambasada amerikane merr si shembull atë që po ndodh me hapësirën “Duty Free” (pa taksa) në Aeroportin Ndërkombëtar të Tiranës.

Deklarata vjen pasi Gjykata Administrative e Shkallës së Parë në Tiranë ka anuluar autorizimin për magazinat doganore private “Duty Free Shop”.

Çështja e dyqaneve “duty free” në aeroportin e Tiranës është bërë objekt gjyqësor mes zotëruesit të mëparshëm të dyqaneve dhe një kompanie amerikane që ka fituar garën e hapur nga Tirana International Airport.

Që prej korrikut të vitit të kaluar, kur nënshkroi dhe kontratën me Tirana International Airport (TIA) shoqërinë që administron aeroportin e Tiranës, kompania amerikane nuk ka mundur të marrë në zotërim zonën e dyqaneve “duty free”.

Deklarata e plotë e ambasadës amerikane:

Në situatën ku ndodhemi sot, rrethanat në lidhje me hapësirën Pa Taksë (Duty Free) në Aeroportin Ndërkombëtar të Tiranës tregojnë sfidat me të cilat përballen investuesit e huaj në Shqipëri. Është zhgënjyese që klima aktuale e biznesit pengon rritjen e investimeve të huaja.

Shqipëria duhet të zbatojë rregulla të drejta dhe transparente në mënyrë të barabartë për të gjitha bizneset. Shpresojmë që qeveria e Shqipërisë të shqyrtojë seriozisht sfidat në mjedisin aktual dhe të zbatojë ndryshime të prekshme, për të tërhequr investimet e huaja shumë të nevojshme.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.