Dy centrale diellorë në Fier – Fuqia totale e instaluar do jetë 100 MW, 2% e energjisë së prodhuar do ti dhurohet shtetit

Përveç ndërtimit të centraleve fotovoltaikë në Karavasta dhe Spitallë, Këshilli i Ministrave i ka hapur rrugë ndërtimit të 2 impianteve të mëdhenj në zonën e Sheq-Marinasit në Fier, që do të jenë investime private e nuk do të përfitojnë nga masat mbështetëse, që parashikon legjislacioni në fuqi. Secili prej centraleve do të ketë një fuqi të instaluar prej 50 MW, me një total prej 100 MW, teksa koha për ndërtimin e vënien në operim do të jetë brenda 50 muajve nga marrja e lejes së ndërtimit.

Centralet “Blue 1” dhe “Blue 2” do të ndërtohen nga bashkimi i përkohshëm i shoqërive “Blessed Investment” dhe “Matrix Konstruksion”, ndërkohë që sipas vendimit të qeverisë, konsorciumi do të duhet t’i japë falas, në formën e një rente “minerare”, ministrisë përgjegjëse për energjinë, sasinë e energjisë elektrike, në masën 2 % të sasisë vjetore të prodhimit të energjisë elektrike ose konvertimin e saj në vlerë monetare. Në rast konvertimi në vlerë monetare, shuma do të duhet të derdhet tërësisht në buxhetin e shtetit.

Gjithashtu, investitori do të duhet të përmbushë kërkesën, sipas rastit, që një pjesë e prodhimit të burimit gjenerues të energjisë t’i shitet furnizuesit publik, sipas legjislacionit në fuqi. Miratimi për ndërtimin e këtyre centarleve vjen pas shpalljes së fituesit në ankandin për ndërtimin e parkut fotovolaik në Spitallë me një fuqi të instaluar prej 100 MW, teksa më herët u shpall fituesi edh për parkun e Karvastasë, me fuqi të instaluar 140 MW. Aktualisht, energjia diellore mbetet pak e shfrytëzuar në vendin tonë, teksa në prodhim janë 11 impiante të vegjël, me fuqi të instaluar 21 MW.

Ola Mitre / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.