Dy skajet e pagës mesatare në Shqipëri – Nga ligjvënësit me 81% më shumë se niveli kombëtar, te aktiviteti me “i varfër”
Një ligjvënës, nëpunës i lartë i administratës shtetërore apo drejtor ekzekutiv ka një pagë mesatare (bruto) afro 81% më të lartë se sa mesatarja në nivel kombëtar. Këto të dhëna, sipas raportit më të fundit të Institutit të Statistikave, mbi tremujorin e katërt të vitit 2020.
Për grup aktivitetin “administrate publike dhe mbrojtja, sigurimi social i detyrueshëm, arsimi, shëndetësia dhe aktivitete të punëve sociale”, paga mesatare bruto në periudhën tetor, nëntor, dhjetor, paga mesatare mujore bruto rezulton 66.435 lekë.
Nga ana tjetër, në grupin e profesioneve elementare, për këtë periudhë kohore, paga mesatare mujore bruto rezulton 40.9% më e ulët se mesatarja në nivel kombëtar.
Nga ana tjetër, në një panoramë të përgjithshme të tremujorit të fundit të vitit pandemik, paga mesatare mujore bruto për një të punësuar me pagë është 54.951 lekë, duke u rritur me 2.8 %, krahasuar me të njëjtin tremujor të vitit të kaluar,
Aktiviteti financiar dhe sigurimi kanë një mesatare mujore bruto 2.1 herë më të lartë se mesatarja kombëtare e pagës bruto mujore. Ndërkaq, aktiviteti më “fatkeq” është ai bujqësisë, pyjeve dhe peshkimit, me një pagë mesatare mujore bruto 40.9% më të ulët se ajo kombëtare.
Jenida Vladi/ SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.