Dyfishohet numri i të paguarve-“Pagat e Luftës”/136 mijë aplikime, refuzohen 18 për qind

17.231 punonjës kanë përfituar “pagën e luftës” prej 26 mijë lekësh për muajin Mars, në llogaritë e tyre bankare, ndërsa 3405 të tjerë janë në proces verifikimi të mëtjeshëm. Të dhënat zyrtare të Drejtorisë së Përgjithshme të Tatimeve, tregojnë se numri i të paguarve është dyfishuar krahasimisht me tre ditë më parë. Tatimet bëjnë me dije po ashtu se deri më tani janë verefikuar aplikimet për 21.392 biznese dhe 35,789 punonjës.

Ndërsa është rritur ndjeshëm edhe numri i individëve që u është miratuar ndihma financiare, përkatësisht 12.600 biznese dhe 20,636 punonjës. Peshën më të madhe e mban Tirana, ku janë të regjistruar 8096 përfitues të cilëve u është miratuar paga minimale prej 26 mijë lekësh, më pas renditet Korça, Durrësi, Fieri, Elbasani, Shkodër dhe në fund është Gjirokastra me 376 përfitues. Në total, deri më datën 7 prill kanë aplikuar 49.232 biznese dhe 86.656 punonjës.

Po ashtu, Drejtoria e Përgjithshme e Tatimeve bën me dije e deri më tani janë refuzuar 15,153 aplikime apo 18 për qind e totalit. Të refuzuarit, që mendojnë se u takon kjo ndihmë, kanë mundësi të paraqesin kërkesën/ankesën e tyre duke duke komunikuar përmes adresës e-mail të Drejtorisë Rajonale, ku ata banojnë.

Kjo mbështetje financiare e qeverisë në kuadër të msave të marra ndaj frenimit të COVID-19, ofrohet për bizneset e vogla që janë mbyllur gjatë kësaj periudhe si dhe për individët në këto subjekte që kanë mbetur të papunë. Ndërsa bizneseve të mëdha u është vënë në dispozicion kreditimi me anë të fondit të garancisë, me qëllim pagesën e punonjësve.

Elisabeta Dosku/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.