Dyshimet për pastrim parash, 7.372 individë në “sitën” e Drejtorisë së Parandalimit të Pastrimit të Parave!
Për vitin 2017, Drejtoria e Përgjithshme e Parandalimit të Pastrimit të Parave ka verifikuar burimet financiare të 7,372 personave. Numri më i madh i verifikimeve është bërë për llogari të institucioneve të Vetting-ut.
Ndërkohë që numër të madh kërkesash për verifikim kanë ardhur edhe nga policia e prokuroria. SCAN ka zbardhur të dhënat zyrtare të Drejtorisë së Përgjithshme të Parandalimit të Pastrimit të Parave për vitin 2017, sipas të cilave, për llogari të procesit të Vetting-ut janë kryer plot 3 mijë verifikime gjyqtarësh, prokurorësh, si dhe personave të lidhur me ta.
Numër të madh kërkesash për verifikim ka paraqitur edhe Policia e shtetit, për llogari të së cilës janë hetuar burimet e 2,497 individëve.
1,198 verifikime janë kryer me kërkesë të Prokurorisë, ndërsa për llogari të ILDKPKI, mësohet se janë verifikuar 677 individë.
Gjatë vitit 2017 numrin më të lartë të rasteve e zënë trafikimi lëndëve narkotike, evazioni fiskal dhe mashtrimet.
Vërehet rritje e rasteve të dyshuara për shpërdorim detyre ose korrupsion, të cilat shënuan numrin më të lartë, të paktën në 5-vitet e fundit.
Lorenc Rabeta/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.