e-Albania – Në nëntor mbi 94 mijë aplikime online për certifikata. Brenda 15 dhjetorit edhe 3 shërbime të reja
Portali qeveritar e-Albania tashmë prej kohësh ofron një listë me 26 shërbime online (dokumente), duke shmangur radhët e gjata në sportelet përkatëse.
Nëpërmjet një postimi në profilin e tij në Facebook, kryeministri Edi Rama ka publikuar edhe të dhënat e dokumenteve që janë gjeneruar online për muajin nëntor.
Sipas tij, vetëm gjatë këtij muaji janë bërë 18,498 aplikime për vërtetime tatimore, 94,466 për certifikata të gjendjes civile dhe 876 për ekstrakte biznesi. Rama ka shtuar më tej se për të shmangur vizitat në sportelet përkatëse, shumë shërbime të tjera të portalit do të ofrohen në çdo zyrë noterie dhe filiali të Postës Shqiptare.
Ndërkohë, ka njoftuar edhe se brenda 15 dhjetorit, listës së dokumentacioneve të portalit e-Albania do t’i shtohen edhe 3 shërbime të reja.
“Brenda datës 15 dhjetor 2017, listës me 26 dokumente shoqëruese, të cilat nuk kërkohen më nga sportelet e institucioneve shtetërore, do t’i shtohen edhe 3 dokumente të tjera të lëshuara nga Qendra Kombëtare e Biznesit që tanimë do të gjenerohen përmes portalit e-Albania:
- Ekstrakt i thjeshtë
- Ekstrakt historik
- Certifikata e regjistrimit (NUIS),” shkruan Rama.
G.D/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.