E drejta e autorit, tarifat fikse – TV paguajnë nga 40 mijë në 1.2 mln lekë, radiot 10 – 300 mijë
Tarifat që do të paguajnë radiot dhe televizionet për të drejtën e autorit tashmë janë transparente. Vendosja e këtyre tarifave dhe bërja transparente e tyre ndikon në formalizimin e këtij tregu dhe shmang aplikimin e tarifave abuzuese.
Nëse i referohemi tarifave që duhet të paguaj një televizion kombëtar publik ose privat varet nga përqindja e kohës së transmetimit në 24 orë të veprës së mbrojtur. Duke ju referuar të ardhurave bruto vjetore mbi çdo operator do të duhet të paguaj nga 1% – 4% të tyre. Ndërsa televizionet lokale do të duhet të paguajnë për të ardhurat vjetore mbi 5 milionë lekë nga 1 – 4 % plus tarifën fikse.
Një mënyrë tjetër e pagesës është edhe ajo në bazë të tarifës fikse në bazë të popullsisë të përcaktuar në licencë. Këto tarifa variojnë nga 40 mijë lekë në 1.2 milionë lekë. Për radiot kombëtare publike dhe private do të kemi të njëjtën skemë përllogaritje por me tarifa që variojnë nga 2-4 për qind herë të ardhurat bruto vjetore.
Për radiot lokale do të kemi pagesë në bazë të përqindjes së kohës së transmetimit që varion nga 1 -3 % të të ardhurave bruto mbi 5 milionë plus tarifën fikse të përcaktuar për radiot. Tarifa fikse për radiot varion nga 10 mijë lekë në 300 mijë lekë.
Entela Barjamaj/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.