“E duam Shqipërinë si gjithë Europa”, Basha: “Ndryshimi do të bëhet i mundur vetëm nga rinia shqiptare”
“Ndryshimi i Shqipërisë do të vijë, dhe do të bëhet i mundur vetëm nga rinia shqiptare”. Këtë mesazh përcolli kreu i Partisë Demokratike, Lulzim Basha, me rastin e 8 dhjetorit, ditën e rinisë, duke shprehur angazhim maksimal për të ndryshuar mënyrën e qeverisjes dhe për të qenë krah qytetarëve.
“Në këto ditë vështirësish të panumërta për familjet shqiptare që përballen me krizën e pandemisë dhe krizën ekonomike ky mesazh vlen, se ndryshimi i Shqipërisë do të vijë dhe jam i bindur se ky ndryshim do të bëhet vetëm nga ju dhe rinia shqiptare. Jam i bindur se ndryshimi që të gjithë duam dhe presim mund ta kthejë në qendër të investitorëve, prodhuesve të mëdhenj, teknologjive të informacionit, turizmit, inovacionit me mundësi të jashtëzakonshëm punësim dinjitoz dhe të mirëpaguar për shqiptarët dhe në veçanti për të rinjtë.” – u shpreh Basha.
Basha foli edhe për kufizimin e mandateve të postit të kryeministrit dhe krijimin e mundësive të rotacionit, duke sjellë qasje dhe mendësi të reja.
“Një ndër objektivat e mi kryesorë do të jetë kufizimi në vetëm dy mandate i postit të kryeministrit. Kufizimi në vetëm dy mandate i kreut të ekzekutivit. Unë jam i bindur se për të kthyer besimin tek politika si një instrument që përmirëson jetën e tyre, si angazhim komunitar që përmirëson shanset dhe mundësitë për të gjithë, duhet zëvendësuar politika si burim privilegjesh, si një e drejtë e kufizuar te një rreth i ngushtë njerëzish dhe duhet të lehtësohet hapja e rrugës brezit të ri, për të marrë në dorë fatet e vendit edhe përsa i përket vendimmarrjes.” – u shpreh kryedemokrati.
Basha u ndal në largimin e rinisë, si pasojë e situatës me të cilën po përballen; varfëria dhe mungesa e mundësive, duke premtuar se ndryshimi është shumë afër.
Nertila Doko / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.