E pashmangshme lufta tregtare – Kina vendos tarifa në 25% për 128 produkte amerikane

Kina ka rritur tarifat me 25%  për 128 produkte amerikane që variojnë nga mishi i derrit dhe vera e deri te frutat.  Kjo ka rritur tensionet mes 2 ekonomive më të mëdha në botë dhe vjen në kundërpërgjigje të tarifave në importe nga SHBA për aluminin dhe çelikun.  Tarifat e Kinës u lajmëruan nga Ministria e Financave në fillim të kësaj jave dhe përputhen me pritshmëritë për reagimin  vendit.

Menjëherë pas lajmërimit, mediat lokale raportuan se nëse SHBA mendonte se Kina nuk do të kundërpërgjigjej apo të merrte masa simbolike, tashmë ky iluzion ka përfunduar.  “Edhe pse Kina dhe SHBA nuk kanë deklaruar në publik se ndodhen në një luftë tregtare,  kjo gjë ka nisur tashmë”,  shkruanin mediat kineze.  Ministria e Tregtisë në Kinë deklaroi se po pezullon detyrimet që ka ndaj Organizatës Botërore të Tregtisë për të reduktuar tarifat mbi 120 mallra amerikanë.

Përkundrazi, tarifat në këto produkte do të rriten me 15% shtesë.  Tetë produkte të tjera, përfshirë mishin e derrit dhe aluminin, do të jenë tashmë subjekt i tarifave shtesë prej 25% dhe masat do të bëhen efektive këtë javë. “Masat janë në përputhje me rregullat e OBT për të mbrojtur interesat kineze”, deklaroi ministria e Financave. Presidenti Donald Trump po përgatit tarifa të tjera për më shumë se 50 miliardë dollarë mallra kinezë, në përpjekje për të ndëshkuar Pekinin për keqpërdorimin e pronës intelektuale në SHBA.  Kina ka premtuar në mënyrë të vazhdueshme se do të hapë ekonominë, por shumë kompani të huaja janë ankuar për trajtimin e padrejtë.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.