E premtja e zezë e naftës – Tjetër kolaps çmimesh, zbret nën 60 dollarë për fuçi
Për sektorin e naftës, e Premtja ka qenë e zezë në kuptimin e parë të fjalës. çmimet e naftës në tregjet globale pësuan një rënie tjetër drastike, duke e mbyllur sesionin me një rënie prej 8%. Nafta amerikane është sot 23% poshtë nivelit të Tetorit, dhe ka prekur nivelin më të ulët në më shumë se 1 vit.
Tashmë edhe nafta brent ka zbritur poshtë nivelit të 60 dollarëve për fuçi, nga rreth 85 që ishte vetëm një muaj më parë. Çmimet e naftës kanë regjistruar sesionin e 7-të me radhë në rënie drastike, pasi gjatë javës, të paktën për 3 sesione, rënia ishte mbi 5%.
Pavarësisht se prodhuesit kryesor po mendojnë shkurtimin e prodhimit, mbingarkesa mbetet shqetësimi kryesor, por edhe lufta mes prodhuesve. Prodhimi amerikan i naftës po rritet më shpejtë se kërkesa.
OPEC do të takohet më 6 dhjetor për të vulosur shkurtimet, me shpresën se do të frenojë një kolaps tjetër të çmimeve, si ai i vitit 2015. Vetëm gjatë Nëntorit rënia fiksohet në më shumë se 20%, për 7 javë me radhë në rënie. Investitorët nuk janë të bindur se ndërhyrja e OPEC do të mund të jetë në gjendje të ngushtojë hendekun kërkesë-ofertë, dhe për këtë arsye ka një reagim të tillë në tregje.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.