Edhe Ferrari e Porsche nën sekuestron e policisë – Operacioni “Vjeshtë 2017” vijon në Shkodër
Plan-operacioni “Vjeshtë 2017” sa vjen e merr përmasa më të mëdha në goditjen e krimit ekonomiko-financiar.
Policia e Shtetit ka sekuestruar ditën e martë 246 metra katrorë pasuri të paluajtshme në Shkodër, si dhe 3 automjete luksoze. Strukturat e policisë së këtij qarku kanë ekzekutuar vendimin e datës 12 shkurt të këtij viti për sekuestro preventive.
Pasuritë e sekuestruara janë në pronësi të shtetasit K.Z., i cili është arrestuar nëntorin e Kaluar për veprën penale “Trafikim të lëndëve narkotike”.
Dyshimi se këto prona janë përfituar përmes parave të siguruara nga veprimtaria kriminale, pasi vlera e tyre kap shuma marramendëse.
Kështu janë sekuestruar si më poshtë:
- Apartament 78 m2 në qytetin e Shkodrës
- Ndërtesë 100m2
- Truall 53 m2 me 15 metra objekt
Ndërkohë që vlera më e madhe i takon makinave luksoze, konkretisht: automjeti tip “Ferrari” me vlerë rreth 200 mijë euro, automjeti tip “Porsche” me vlerë rreth 100 mijë euro, automjet tip “Peugeot” me vlerë 10 mijë euro.
Nën operacionin e koduar “Vjeshtë 2017”, i cili është vënë në zbatim prej disa javësh, janë vendosur në sekuestro preventive disa dhjetëra prona me vlerë të konsiderueshme në të gjithë vendin.
Angelo Haruni/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.