Edhe huaja në rënie. T2 tkurr lehtë portofolin e kredisë, por Durrësi, Elbasani, Vlora dhe Lezha, në rritje

Ashtu si me depozitat, edhe huaja ka pësuar një rënie gjatë tremujorit të dytë të vitit, mjaft të lehtë. Gjatë tremujorit të parë, kredia në sektorin bankar kapte shifrën e 380 miliardë lekëve në total, ndërkohë që në tremujorin e dytë ka zbritur në 374 miliardë lekë. Edhe në këtë rast, efekti i rënies duket të jetë thjesht sezonal dhe i shkëputur nga pasojat e pandemisë dhe krizës ekonomike që e ka shoqëruar.

Tremujori i dytë i vitit, historikisht është shoqëruar me një rënie të portofolit të huasë në sektorin bankar shqiptar. Por, në rastin e huave, ajo që bie në sy, ndryshe me çka ka ndodhur me depozitat në tremujorin e dytë, është ecuria sipas qarqeve. Ndër 8 qarqet e mëdha të marra në analizë, 4 prej tyre, pra gjysma, regjistrojnë një rritje të huasë, paçka se mjaft të lehtë. Këto qarqe janë: Durrësi, Elbasani, Vlora dhe Lezha. Tirana, Shkodra, Korça dhe Fieri ndërkohë, regjistrojnë një rënie të lehtë të portofolit të huasë në tremujorin e dytë të vitit, krahasuar me tremujorin paraardhës.

Roel Korkuti / SCAN 

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.