Edhe një komunist për Francën – Premton rritje të shpenzimeve me 273 mld euro

Në Francë në garën presidenciale, veç Marine le Pen, që përfaqëson esktremin e djathtë, ka edhe një kandidat që përfaqëson ekstremin e majtë, Jean-Luc Melenchon.

Ky i fundit ka premtuar të rrisë shpenzimet me 273 miliardë euro. Kjo shumë përfshin  edhe një plan 100 miliardësh për të stimuluar ekonominë franceze.

Sipas lëvizjes së Melenchon, që quhet “Franca e pathyeshme”, këto para do të financohen nëpërmjet taksave më të larta, luftës ndaj evazionit fiskal dhe rritjes më të shpejtë ekonomike.

Masat e propozuara përfshijnë një rritje me 15% të pagës minimale në Francë, fonde të reja për të luftuar varfërinë si dhe krijimin e vendeve të reja të punës.

Melenchon është në negociata me socialistët për një bashkëpunim në këto zgjedhje presidenciale duke përfituar nga nervozizmi i investitorëve që nxitet nga gjasat e fitores së le Pen.

Nën planin e “Francës së Pathyeshme”, papunësia në vend do të binte në 6% brenda vitit 2022, nga 10% aktualisht, ndërkohë që rritja do të përshpejtohet në 2% vitin e ardhshëm. Pesha totale e taksave do të rritej në 49% të Prodhimit të Brendshëm Bruto.

Gjasat e Melenchon në këto zgjedhje nuk janë minimale. Sondazhet i japin atij rreth 12% të votave në raundin e parë. Në rast se të majtët do të bashkoheshin, atëherë edhe gjasat për të fituar rriten ndjeshëm.

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.