Edukimi në vazhdim – Shehu: Kreditet domosdoshmëri, tarifat variojnë nga 0-100 mijë lekë
Kreditet e profesionistëve të shëndetësisë mund të kushtojnë nga zero në 100 mijë lekë. Këto tarifa janë për ato aktivitete shkencore, që orgnizohen në vend, ndërsa për ato që organizohen jashtë Shqipërisë, tarifat janë më të larta. Sipas Drejtores së Qendrës Kombëtare të Edukimit në Vazhdim, Entela Shehu, kreditë u kushtojnë më shumë stomatologëve. Ndërkohë që edukimi në vazhdim është i domosdoshëm për të gjitha bluzat e bardha.
“Mbledhja e krediteve të edukimit në vazhdim është një proces që ka kosto, që variojnë nga 0, pra ka aktivitete që janë edhe asnjë kosto dhe që mund të kryhen pa asnjë lloj pagese. Por, natyrisht, ka dhe aktivitete që janë me kosto, të cilat nganjëherë janë edhe shumë të larta. Për aktivitetet që zhvillohen brenda vendit, konferenca të cilat janë me pagesë apo trajnime që janë brenda vendit, kostot mund të variojnë, aktiviteti më i shtrenjtë mund të jetë edhe 100 mijë lekë të vjetra, ndoshta dhe më shumë nganjëherë, varet nga lloji i aktivitetit. Ka aktivitete, sidomos aktivitetet që zhvillohen për stomatologët, të cilat ata marrin pjesë jo aq për të marrë kreditet se sa vërtetë për të fituar disa aftësi në teknika dhe procedura të reja që atyre iu duhen për zhvillimin e tyre profesional, ka kurse që janë vërtetë të shtrenjta, kosto qindra euro.”
Edukimi në vazhdim në dy vitet e fundit po aplikohet edhe për infermierët. Ndërkohë që interesin më të madh për plotësimin e këtyre krediteve e kanë mjekët. Në një fazë prej katër vitesh, mjekët duhet të plotësojnë 120 kredite, farmacistët 60 dhe infermierët 40 kredite. Fluksi më i madhi raportimeve për aktivitete e ndjekura nga këto kategori pranë QKEV-së është në fazat e rinovimit të licencave ose në përfundimin e afati kohor për plotësimin e krediteve.
Entela Barjamaj/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.