Efektet e Brexit pa marrëveshje – Draghi: Sektori privat duhet të rrisë përgatitjet

Kompanitë duhet të rrisin përgatitjet e tyre për një Brexit të mundshëm pa marrëveshje. Deklarata ka ardhur nga presidenti i Bankës Qendrore Europiane, Mario Draghi, drejtuar liderëve të Bashkimit Europian.

Komentet e Draghit kanë ardhur një ditë pasi krerët e BE-së ranë dakord t’i jepnin Britanisë një shans përfundimtar për të lënë bllokun me një marrëveshje, duke zgjatur afatin.

“Autoritetet dhe bankat qendrore janë të përgatitur, por sektori privat duhet të rritë përgatitjet,” tha Draghi gjatë Samitit Europian në Bruksel.

Në rastin e një Brexit pa marrëveshje, tregtia midis Britanisë dhe BE-së do të përballet me barriera të menjëhershme tregtare dhe kufizime në biznes. Draghi tha se pasojat negative për eurozonën do të ishin të kufizuara, por ai pranoi se disa vende ishin më të ekspozuara se të tjerët.

Franca, Gjermania, Belgjika dhe Holanda janë midis vendeve të BE-sw me flukse të mëdha tregtare me Britaninë dhe ata kanë të ngjarë të ndiejnë më shumë dhimbjen e një Brexit pa marrëveshje.

G.D/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.