Efekti i kundërt nga Brexit – Numri i shtetasve të BE-së që punojnë në Britani rritet ndjeshëm
Numri i shtetasve të Bashkimit Europian që punojnë në Mbretërinë e Bashkuar është rritur në një nivel rekord të lartë, pavarësisht shqetësimeve të daljes post-Brexit.
Rreth 2.37 milionë njerëz nga vendet e Bashkimit Europian ishin të punësuar në Britani në periudhën Prill-Qershor të këtij viti, raporton zyra Kombëtare e Statistikave, që është shifra më e madhe në historik.
Të dhënat e publikuara këtë javë treguan se numri është rritur me 126 mijë nga e njëjta periudhë një vit më parë, që përfshinte referendumin për të dalë nga Bashkimi Europian.
Kjo u nxit kryesisht nga një rritje e papritur e punonjësve bullgarë dhe rumunë në Mbretërinë e Bashkuar. Në vitin e fundit, shifra për këto është rritur me më shumë se 25%, në 337 mijë, ndërkohë që më shumë punëtorë kanë përfituar nga aksesi i vonë i vendeve të tyre me tregun e punës në Britani.
Ndërkohë, numri i punëtorëve nga vende të tjera të Europës Lindore, si Polonia dhe Lituania, që kanë patur akses për më shumë se një dekadë, ra në 997 mijë nga më shumë se 1 milionë që ishte një vit më parë.
Të dhënat vijnë pas lajmërimit të Dhomës së Tregtisë në Britani, për një dobësi të besimit të eksportuesve dhe mungesës së punonjësve të kualifikuar pas Brexit.
Megjithatë, Zyra e Statistikave theksoi se ndërsa shifra totale e qytetarëve europianë të punësuar në Mbretërinë e Bashkuar është rritur me bazë vjetore, norma e rritjes është ngadalësuar në tremujorin e fundit.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.