‘Eko-Art’ me kapakë plastikë – 23 vjeçari realizon pikturën murale të frymëzuar nga Van Gogh me 200 mijë shishe të ricikluara

Pikërisht në Caracas një artist 23 vjeçar kërkon të rrisë ndërgjegjësimin mbi çështjen e ndotjes përmes krijimit të një murale të madhe të përbërë nga 200 mijë kapakë shishesh. El Hatillo, një lagje e shkatërruar e Karakasit e zhytur nga mbeturinat dhe plehrat është vendi ku artisti Oscar Olivares, edhe pse shumë i ri, konkretizoi idetë e tij tashmë të qarta për rëndësinë e ekologjisë dhe mbrojtjes së mjedisit.

Këto janë bazat mbi të cilat lindi projekti që ndërthur artin dhe vetëdijen shoqërore dhe që çoi në krijimin e një diçkaje më të madhe, përmes mbledhjes dhe riciklimit të mbi 200 mijë kapakëve plastikë nga shishet e përdorura.

Murali është më i madhi i këtij lloji në Venezuelë dhe një nga më të mëdhenjtë në të gjithë Amerikën e Jugut: është 45 metra i gjatë dhe varion në lartësi nga 3 në 7 metra dhe është një shembull i shkëlqyeshëm i rizhvillimit urban të një zone të vështirë dhe shumë të degraduar të qytetit.

Artistit iu deshën 3 muaj për të përfunduar Eko-Muralin e tij shumëngjyrësh dhe u ndihmua nga një ekip punëtorësh, kontributi i Lëvizjes në Arkitekturë për të Ardhmen dhe OJQ Okospiri e cila merret me pastrimin e mjedisit dhe riciklimin për të bërë botën më të gjelbër.

Edhe të gjithë qytetarët mund të përfshiheshin në realizimin dhe të ndihmonin konkretisht në krijimin e muralit, mjaftonte që të ishe aty prezent, në fakt kishte shumë qytetarë që futën një pjesë të tapave dhe të tjerët që i sollën nga ana tjetër ndërsa projekti përparonte.

Përfshirja e qytetarëve është gjithashtu një nga çelësat përmes të cilit është kryer ndërgjegjësimi mbi çështjet e ekologjisë, mbrojtjes së mjedisit dhe rëndësisë së riciklimit, sepse pasi të gjithë kanë qenë në gjendje të fusin pjesë të vogla të punës për të krijuar diçka shumë më të madhe, në të njëjtën mënyrë, secili prej nesh mund të kontribuojë në mbrojtjen e planetit tonë përmes gjesteve të vogla dhe veprimeve të përditshme.

Artisti shpjegoi ndjenjat e tij në krijimin e veprës: “Pjesa më stimuluese është ajo që qëndron pas pikturës murale, është përgatitja e saj. Në veçanti, mbledhja e kapakëve të ngjyrave të nevojshme, veçanërisht ato të verdha, e cila u bë nga shumë njerëz që bashkëpunuan. Ky nuk është art i bërë nga një artist, por art i bërë nga njerëz të zakonshëm”.

Puna është një përzierje midis një stili të frymëzuar nga Van Gogh për shembull prania e ngjyrës së verdhë dhe lulediellit të famshëm, të cilat artisti ka pikturuar në disa piktura, dhe elementeve karakteristike të kulturës lokale, të tilla si papagajtë shumëngjyrësh dhe qyteti i Karakasit që përshkruhet natën me të gjitha dritat e tij. Në qiellin e pikturës murale, shfaqen dy UFO që përfaqësojnë lidhjen midis njeriut dhe hapësirës.

Puna synon të rrisë ndërgjegjësimin tek të gjithë qytetarët për çështje të ekologjisë, respektit për mjedisin dhe mbetjeve plastike në botë, si dhe të jetë një shembull i bukur i rizhvillimit të një zone shumë të degraduar të qytetit të Karakasit. (Positizie)

Edel Strazimiri / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.