Ekonomi: Bizneset të mbrojnë pronësinë e tyre industriale, përbën garanci për konsumatorin
“Pronësia industriale është një mjet komunikimi në treg mbi cilësinë dhe origjinën e produkteve që na ofrohen. Ajo përbën garanci për konsumatorin, por edhe reputacion për ju si sipërmarrës. Është fakt i njohur që sistemi i pronësisë industriale është motor nxitës i zhvillimeve të tregut”.
Kështu është shprehur sot ministria e Zhvillimit Ekonomik, Turizmit, Tregtisë dhe Sipërmarrjes Milva Ekonomi, gjatë një vizitë në një prej kompanive shqiptare që prodhojnë produkte “Made in Albania”.
Ajo shtoi se për shumë kompani vlera e aseteve jo materiale, siç janë patentat mbi shpikjet, markat tregtare apo dizenjot industriale e tejkalon dukshëm vlerën e aseteve fizike, ndaj është i domosdoshëm regjistrimi dhe mbrojtja e tyre.
Ekonomi u shpreh se është për të ardhur keq që ka një numër të vogël markash të regjistruara jashtë territorit të Shqipërisë, ndaj kërkohet një punë më e madhe për të ndërgjegjësuar kompanitë shqiptare të regjistrojnë markat e tyre në vendet ku eksportojnë duke synuar mbrojtjen e produkteve.
Më tej ministrja theksoi se qeveria shqiptare i ka përshtatur më së miri kriteret, duke aderuar në marrëveshjet ndërkombëtare të kësaj fushe, për t’i dhënë mundësinë sipërmarrëseve shqiptare, të kërkojnë të drejtat e mbrojtjes edhe në vendet partnere, ku kanë të shtrirë aktivitetin e tyre.
Osman Dedja/RTV SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.