Ekonomi dhe Peleshi inspektim në zonat e përmbytura në Durrës: “Banorët të bashkëpunojnë që situate të normalizohet sa më shpejt”
Ministrja e Bujqësisë dhe Zhvillimit Rural, Milva Ekonomi ishte sot në Njësinë Administrative Katund i Ri në Durrës, një prej zonave më të dëmtuara nga dalja e lumit Erzen prej shtratit si pasojë e reshjeve të shiut të këtyre ditëve. Gjatë takimit me banorët, ministrja Ekonomi shoqërohej nga ministri i Mbrojtjes Niko Peleshi dhe kryetarja e bashkisë së Durrësit Emirjana Sako.
Pas përmirësimit të motit ditën e sotme, lumi Erzen është tërhequr në shtratin e tij, por shumë shtëpi mbeten ende nën ujë në këtë njesi, në bashkinë e Durrësit. Ministrja Ekonomi garantoi gatishmërinë e strukturave të Drejtorisë Rajonale të Ujitjes e Kullimit (DRUK), për të ndërhyrë në tërheqjen e ujërave nga zona. Por nga ana tjetër, ministrja e Bujqësisë ka kërkuar bashkëpunimin e banorëve të zonës për zhbllokimin e kanaleve të niveleve të treta.
“Këtu kemi një situatë ku duhet të bashkëpunojnë dhe banorët e zonës. Sepse nëqoftëse vazhdojnë t’i mbajnë të mbyllura kanalet e treta, do të jetë e vështirë dhe për forcat e emergjencave civile, por dhe për banorët vetë, që uji të largohet me shpejtësi., tha ministrja Ekonomi gjatë vizitës.
Ministri i Mbrojtjes Niko Peleshi siguroi gatishmërinë e FA dhe vuri theksin te mësimet që duhen nxjerrë me qëllim që reshjet e dendura dhe dalja nga shtrati i lumit Erzen të kenë sa më pak pasoja.
“Ne marrim detyra tona, komuniteti duhet të marrë detyrat e veta, kemi patur edhe debate me disa banorë, nuk mund t’i kërkojmë llogari bashkisë kur kanali shkarkues e bllokon për të bërë një copë rrugë.”- u shpreh ai.
Gjatë ditëve të fundit, Forcat e Armatosura kanë evakuuar disa familje në Katundin e Ri, një pjesë prej të cilave janë strehuar në Konvaleshencën e Durrësit.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.