Ekonomi në festën e Prezës: Shqipëria duhet të vizitohet nga ne vetë

Vlerat e trashëgimisë kulturore duhet të bashkohen për të kontribuar në një zhvillim më të madh ekonomik dhe social të zonave.  Është ky mesazhi që ka dhënë Ministrja e Zhvillimit Ekonomik, Turizmit, Tregtisë dhe Sipërmarrjes, Milva Ekonomi, gjatë aktivitetit të zhvilluar ditën e Diel në Kalanë e Prezës.

Eventi mblodhi produktet karakteristike të zonës, nga artizanati tek kulinaria dhe prodhimi i verërave dhe vajit të ullirit, dhe u shoqëruar me këngë e valle të trevave të ndryshme të vendit.

Ministrja i bëri apel operatorëve turistikë të përfitojnë nga ngjarje të tilla, duke i bërë pjesë të paketave për vizitorë të huaj që kërkojnë këtë lloj turizmi kulturor. Por mbi të gjitha sipas Ekonomit, janë shqiptarët të cilët duhet të përfitojnë nga bukuritë e vendit tonë.

“Shqipëria jonë e bukur paraprakisht duhet të vizitohet nga ne vetë. Treguesit janë shumë pozitivë në këtë drejtim,  pasi vitin e shkuar vizitat e turistëve vendas në parqet kombëtare u rrit me 3.3 herë më shumë se një vit më parë dhe kjo është një ngjarje për t’u inspiruar dhe për të zbuluar gjithë atraksionet turistike që kemi në vend”, tha Ekonomi.

Përpjekjet e zonës së Vorës janë që ajo të njihet dhe promovohet për pasurinë e saj. Ministrja diskutoi me fermerët, artizanët dhe sipërmarrësit e zonës për mundësinë e përfshirjes në guida turistike, si edhe për tregjet e brendshme dhe të jashtme për produktet e tyre.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.