Ekonomia amerikane përballë Delta-s/ Fed pret që kriza e re shëndetësore të mos e frenojë rimëkëmbjen

Ekonomia amerikane vazhdon të regjistrojë progres drejt standardeve të Rezervës Federale për zvogëlimin e programeve të saj të emergjencës në periudhën e pandemisë, deklaroi Kryetari i Fed, Jerome Powell. Në një fjalim në konferencën ekonomike Jackson Hole, Powell sinjalizoi se banka qendrore amerikane do të mbetet në pritje ndërsa përpiqet të stimulojë ekonominë në rritjen e punësimit, duke përsëritur se ai dëshiron të shmangë fokusin nga inflacioni “kalimtar” dhe potencialisht dekurajimin e rritjes së vendeve të punës në process.

Për vendimin potencialisht të afërt nga Fed për të filluar uljen e blerjeve mujore të aseteve prej 120 miliardë dollarësh, Powell tha se koha që nga takimi i politikave të Fed në korrik “solli më shumë përparim” drejt përmirësimit të tregut të punës, me gati një milion vende të shtuara, dhe se ky përparim duhet të vazhdojë.

“Por, kjo periudhë përkoi me përhapjen e mëtejshëm të variantit Delta dhe ne do të vlerësojmë me kujdes të dhënat dhe rreziqet në zhvillim,” tha Powell. Ai sinjalizoi se diskutimet e Fed për periudhën e saktë se kur do të fillojë reduktimin e programit të blerjes së bonove mbeten ende të pazgjidhura, dhe tani duhet të përballen me rreziqet shëndetësore dhe ekonomike të shkaktuara nga variant Delta.

Zyrtarët e Fed kanë thënë se presin që kriza e re shëndetësore të mos e frenojë rimëkëmbjen e ekonomisë. Pritjet për rritjen e vazhdueshme të vendeve të punës bazohen pjesërisht në shkollat ​​e rihapura, lehtësimin e kufizimeve të kujdesit për fëmijët dhe një kthim të qëndrueshëm të shpenzimeve të konsumatorëve, zhvillime që mund të ndikohen nga përkeqësimi i përhapjes së koronavirusit.

Zyrtarët e Fed “presin të shohin krijimin e vazhdueshëm të vendeve të reja të punës. Dhe ne do të mësojmë më shumë për efektet e variantit Delta,” tha Powell në fjalën e tij. “Për momentin unë besoj se politika e Fed është e pozicionuar mirë; si gjithmonë, ne jemi të përgatitur për t’u përshtatur ndaj zhvillimeve të jashtme.”

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.