“Ekonomia”, besimi në rritje – Treguesi i Ndjesisë në nivelet më të larta në 10 vjet
Besimi i bizneseve në ecurinë e ekonomisë u përmirësua më shumë në tremujorin e parë të këtij viti. Sipas Bankës së Shqipërisë, treguesi i ndjesisë ekonomike u rrit sërish dhe ka arritur nivelet më të larta që nga viti 2006. Në tremujorin e parë të këtij viti, rritja e treguesit të ndjesisë ekonomike ka ardhur nga një perceptim gjithnjë e më pozitiv në të gjithë sektorët e biznesit, ndërkohë që treguesi i besimit konsumator pësoi një rënie të lehtë.
Sektori i ekonomisë me rritjen më të lartë në treguesit e besimit ishte ai i shërbimeve, me një rritje prej 10.1% gjatë tremujorit të parë. Bizneset e këtij sektori e vlerësuan në rritje të qëndrueshme si ecurinë e përgjithshme të biznesit të tyre, ashtu edhe gjendjen e kërkesës.
Sektori i ndërtimit regjistroi sërish rritje të besimit, me 5.9%. Përmirësimi erdhi sidomos nga rritja e numrit të kontratave porositëse, me 10.8%, por, edhe nga një rritje e lehtë e aktivitetit ndërtues në tërësi.
Në fillim të këtij viti, edhe në sektorin e industrisë ka një perceptim më pozitiv, pas ecurisë së zbehtë gjatë vitit të kaluar. Treguesi i besimit në industri u rrit me 4.3%, e mbështetur nga një rritje e lartë e volumit të prodhimit industrial dhe nga zgjerimi i kontratave porositëse.
Një tjetër sektor ku besimi është ringritur pas rënies së tremujorit të fundit 2016 është tregtia. Në tremujorin e parë të këtij viti, treguesi i besimit në sektorin e tregtisë u rrit me 2%, e mbështetur kryesisht nga vlerësimet më pozitive të subjekteve lidhur me ecurinë e përgjithshme të biznesit.
Ndërkohë, treguesi i besimit konsumator në tremujorin e parë të vitit pësoi një rënie të lehtë me 0.4%. Rënia u përcaktua sidomos nga rënia e balancës së blerjeve të mëdha, ndërsa treguesit e tjerë ishin përgjithësisht pozitivë.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.