“Ekonomia botërore, nën rrezik” – OECD: Virusi çon ekonominë drejt tkurrjes së parë që prej vitit 2009

Rritja ekonomike botërore do të bjerë në nivele që nuk janë parë në 1 dekadë, ndërkohë që koronavirusi po godet kërkesën dhe ofertën, duke sfiduar qeveritë dhe bankat qendrore që të përgjigjen ndaj situatës, sipas Organizatës për Bashkëpunim dhe Zhvillim Ekonomik. Organizata me seli në Paris paralajmëroi gjithashtu për një tkurrje të ekonomisë botërore në tremujorin e parë.   Projeksioni për vitin e plotë u ul në 2.4%, nga 2.9%, që është norma më e dobët që prej vitit 2009.

“Nëse situata përkeqësohet, do të duhen politika të koordinuara mes ekonomivë më të mëdha në botë”, deklaroi Organizata.   Në raportin “Koronavirusi: Bota nën rrezik”, OECD theksoi se situata mund të përkeqësohet.   Sipas projeksioneve, epidemia në Kinë arrin majën në këtë tremujor dhe infeksionet në pjesë të tjera të botës qëndrojnë të buta. Nëse zgjat më shumë dhe përhapet më shpejtë në Azi, Europë dhe SHBA, ndikimi ekonomik do të jetë shumë më i madh. Në këtë rast, ekonomia botërore do të rritet me vetëm 1.5%, me mundësi të recesionit në shumë ekonomi përfshirë Japoninë dhe Eurozonën.

Përmasa e goditjes ekonomike e bën të vështirë për politikëbërësit që të reagojnë, pasi në shumë vende, bankat qendrore kanë boshatisur arsenalin duke ulur normat e interesit nën dyshemesë dhe shpenzuar miliarda në treg të hapur. Organizata theksoi se ekzistojnë disa masa që Qeveritë munden dhe duhet ti marrin menjëherë. Këtu përfshihen; mbështetje fiskale për shërbimet shëndetësore, regjime fleksibël të punës me garanci të pagave, ofrimi i likuiditetit në sektorin financiar si dhe mbështetje e shënjestruar për industritë e ndikuara më shumë si turizmi.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.