Ekonomia britanike tkurret me 20.4%! Performanca më e keqe në një ekonomi të madhe deri më tani
Ekonomia britanike u tkurr me normë rekord prej 20.4% në tremujorin e dytë, periudhë që përfshin masat më të ashpra të karantinës së koronavirusit, ç’ka përbën tkurrjen më të pjerrët të raportuar nga një ekonomi e madhe deri më tani.
Të dhënat zyrtare të publikuara ditën e Mërkurë, treguan gjithashtu se ekonomia e 6 më e madhe në botë ka hyrë në recesion, pasi është tkurrur për të dytin tremujor radhazi. Ka patur shenja të një rimëkëmbjeje në muajin Qershor, ku prodhimi u rrit me 8.7% nga Maji, sipas zyrës Kombetare të Statistikave. Megjithatë, analistët thonë se kjo reflektoi një rritje të aktivitetit të pezulluar gjatë karantinës.
Përmasa e goditjes tek Produkti i Brendshëm Bruto mund të ngre pyetje mbi trajtimin e pandemisë së koronavirusit nga kryeministri Boris Johnson. Britania ka regjistruar numrin më të madh të vdekjeve në Europë nga virusi me mbi 46,500, sipas të dhënave të qeverisë, ndërkohë që zyra e Statistikave në Londër tregon për mbi 50,000 vdekje të lidhura me sëmundjen nga 1 Marsi më 30 Qershor.
Ekonomia e britanisë qëndron 17% poshtë nivelit të muajit Shkurt, përpara se të godiste virusi. Rënia për tremujorin e dytë ishte thuajse në linjë me projeksionet e analistëve dhe kaloi 12.1% rënie të ekonomisë së Eurozonës dhe 9.5% tkurrje tremujore në SHBA.
“Të dhënat e sotme konfimrojnë se kanë ardhur kohët e vështira. Qindra mijëra njerëz kanë humbur vendet e punës dhe fatkeqësisht, më shumë do të ndjekin në muajt e ardhshëm”,- tha ministri i Financave, Rishi Sunak.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.