Ekonomia e emigracionit! Shqiptarët në Itali vlejnë më shumë se PBB e Shqipërisë

256 mijë shqiptarë, emigrantë të rregullt në Itali dhe që janë në marrëdhënie të rregullt pune, kontribuojnë me pak më shumë se 12 miliardë euro në ekonominë e vendit fqinj, thotë një raport i fundit. Ky raport zbulon se, emigrantët e huaj në marrëdhënie pune në vend janë 2.4 milionë dhe prodhojnë 131 miliardë euro në formë taksash, çka përkthehet në 9% të Prodhimit të Brendshëm Bruto të vendit.

Me 256.383 emigrantë në 2016, shqiptarët janë grupimi i dytë më i madh pas atyre nga Rumania, të cilët numërohen në 662 mijë. Kjo do të thotë se, shqiptarët kontribuojnë në ekonominë italiane me rreth 12 miliardë euro në vit, çka përkthehet në thuajse 1% të Prodhimit të Brendshëm Bruto. Të llogarisësh këtu faktin se një pjesë e madhe e shqiptarëve në vendin fqinj tashmë janë bërë italianë juridikisht, apo edhe faktin se në konsideratë merren vetëm kontributet dhe jo impakti që kanë në ekonomi shqiptarët që mund të kenë një biznes, e që në fakt janë të paktën 32 mijë, atëherë kontributi real i shqiptarëve në ekonominë italiane e tejkalon bindshëm normën e 1%. 12 miliardë eurot i referohen vetëm kontributeve për sigurimet shoqërore dhe tatimit mbi të ardhurat.

Një impakt në rreth 1% të Prodhimit të Brendshëm Bruto vetëm nga taksat që aplikohen mbi pagën, është një normë relativisht e lartë, për një vend që prej vitesh vuan një rritje ekonomike nën 1%. Shifra rezulton pak më e lartë se i gjithë Prodhimi i Brendshëm Bruto i Shqipërisë dhe ilustron mjaft mirë, jo vetëm potencialin e humbur, por edhe forcën reale të emigrantëve në Shqipëri, për shkak të remitancave, por edhe turizmit, duke qenë se emigrantët përbëjnë bazën e turistëve, që vizitojnë vendin tonë gjatë pushimeve verore, por edhe atyre dimërore.

Numri i sipërmarrësve

Të dhënat e fundit tregojnë se, në Itali ka 41.153 shqiptarë sipërmarrës. Kjo shifër i referohet vetëm atyre që rezultojnë juridikisht si të huaj dhe jo shqiptarëve të cilët janë bërë shtetas italianë. Të dhënat tregojnë se shqiptarët zënë 6.1% të totalit të sipërmarrësve të huaj në vend dhe se janë të katërtit në listë, pas shtetasve nga Maroku, Kina, Rumania dhe Zvicra. Shifrat i referohen vitit 2016, në të cilin numërohen 448 mijë shtetas shqiptarë emigrantë në vend. Kjo do të thotë se, thuajse një në dhjetë shqiptarë që ka zgjedhur të jetojë në emigrim në Itali, ka vendosur të merret me një biznes, të çfarëdolloj qoftë ai.

Disa të dhëna të tjera të pak kohëve më parë, tregonin se në Itali ka rreth 32 mijë biznese me pronësi apo bashkëpronësi shqiptare, çka do të thotë se një pjesë e konsiderueshme e shqiptarëve sipërmarrës, thuajse një në katër, nuk janë pronarë të vetëm të ndërmarrjes së tyre dhe se e ndajnë me të paktën një person tjetër, në pjesën dërrmuese të rasteve, po shqiptar, që mund të jetë edhe familjar i afërt, apo bashkëshort a bashkëshorte. Në Itali, një ndërmarrje nga dhjetë drejtohet nga një i huaj. Pjesa dërrmuese e të huajve sipërmarrës në Itali operojnë në sektorin e tregtisë dhe ndërtimit.

Në total janë 575 mijë ndërmarrje në Itali të ndërtuara dhe drejtuara nga shtetas me origjinë joitaliane. Të dhënat e  fundit tregojnë se, ndërkohë që ndërmarrjet e italianëve janë pakësuar me rreth 20 mijë njësi, gjatë tremujorit të parë, ato të të huajve janë rritur me 3674 njësi. Norma dhe prevalenca e ndërmarrjeve të të huajve në Itali varion sipas provincave, por edhe sipas sektorëve. Në terma të përgjithshëm, në veri të Italisë ka më shumë ndërmarrje që janë krijuar nga të huajt sesa në jug.

Shtetasit nga Maroku janë ata që kanë numrin më të lartë të ndërmarrjeve të huaja në vend, paçka se këta nuk janë ndër 3 grupimet më të mëdha të të huajve në vend. Shqiptarët, ndërkohë, paçka se janë grupimi i dytë më i madh i të huajve në vend, me rreth gjysmë milion, janë në vend të katërt kur bëhet fjalë për sipërmarrës të huaj. Gjithsesi, janë rreth 31.329 mijë shqiptarë, thotë një raport i fundit i dhomave të tregtisë në Itali, që kanë ndërtuar një ndërmarrje në vend. Me një llogari të shkurtër dhe të përafërt, shifra prej 31 mijë ndërmarrjesh të ndërtuara nga shqiptarë, po të marrim parasysh faktin se, një familje mund të mbahet nga një biznes, tregon se, janë rreth 100 mijë shqiptarë në Itali që jetojnë me një biznes privat. Të dhënat e fundit flasin për 470 mijë shtetas shqiptarë që jetojnë në Itali, e nëse 100 mijë prej tyre jetojnë nëpërmjet një biznesi familjar, atëherë rezulton se një në pesë shqiptarë e fiton jetesën nëpërmjet të bërit biznes. Kjo hartë ndërkohë, tregon se në cilat provinca, shqiptarët janë të parët mes të huajve të tjerë sa i përket bizneseve private. Në Varese, Savona, Trento, Cuneo, Cesena, Piacenza, Pistoia, Rimini, Siena, shqiptarët lënë pas të gjithë të huajt e tjerë, përfshirë marokenët, kinezët, apo rumunët. Në jug të Italisë ndërkohë, përqendrimi i sipërmarrësve shqiptarë është tepër i vogël.

Emigrantët shqiptarë në Itali pakësohen

Shqiptarët në Itali janë pakësuar, thonë të dhënat e fundit të Institutit Italian të Statistikave. Por, këto të dhëna janë  “gënjeshtare”, pasi shqiptarët në Itali mund të jenë pakësuar si status juridik, por realisht kjo nuk është e vërtetë, pasi një pjesë e madhe e tyre kanë marrë nënshtetësinë, duke u bërë përpara ligjit italianë. Të dhënat e Istat tregojnë se, në vitin 2016 kishte 482.959 shtetas të huaj me leje qëndrimi në Itali që ishin shqiptarë. Në vitin 2017, kjo shifër zbriti çuditërisht në 441.838 mijë. Vetë Istat thotë se, kjo rënie, vjen si pasojë e marrjes së nënshtetësisë, por edhe si pasojë e rënies së fluksit në hyrje.

Pavarësisht se në rënie, shqiptarët vijojnë të mbeten grupimi i dytë më i madh i të ardhurve, pas Nigerisë, duke lënë në vend të tretë Marokun. Në vitet 2015-2016 janë rreth 35 mijë shtetas shqiptarë që kanë hyrë rregullisht në vend, duke u pajisur me leje qëndrimi. Pjesa dërrmuese e tyre kanë deklaruar se motivi i ardhjes në Itali është familjar, dhe jo për punë, arsim apo shkaqe humanitare. Të dhënat e 2016-ës tregojnë se, 68.99% e të ardhurve nga Shqipëria ishin për arsye familjare dhe vetëm 7.2% për arsye pune. Pavarësisht se është shifër e ulët, kjo është norma më e lartë mes vendeve kryesore. Vihet re gjithashtu një rënie e numrit të atyre që shkojnë në vendin fqinj për arsye studimi.

Një tjetër e dhënë tregon qartë llojin e emigrimit të ri të shqiptarëve drejt Italisë, pra jo më personal, por në pjesën dërrmuese të rasteve, në formën e bashkimit familjar. Thuajse 40% e familjeve shqiptare në Itali janë të tipologjisë së një çifti me fëmijë dhe kjo është norma më e lartë mes të huajve të tjerë. Vetëm 16.9% e familjeve shqiptare përbëhen nga një person i vetëm, tregon Istat. Situata jo e mirë ekonomike që ka kaluar dhe po kalon Italia së fundmi, por edhe trendi i ri për vendet e Europës Veriore, shpjegon qartë mungesën e interesit të shqiptarëve për të emigruar drejt fqinjëve, ku cikli tashmë mund të quhet i mbyllur. Në vitet në vijim, shqiptarët në Itali do të bëhen gjithmonë e më shumë italianë, ndërkohë që gjithmonë e më pak do të shkojnë në vend, duke ulur për rrjedhojë numrin e emigrantëve shqiptarë në Itali.

Roel Korkuti/SCAN Magazine

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.