Ekonomia e Eurozonës, në vrull  – Eurostat: Rritet me 2.5% gjatë 2017-ës, niveli më i lartë në 10 vite

Ekonomia e Eurozonës është rritur me normën më të shpejtë në 1 dekadë për 2017-ën, tregojnë të dhënat paraprake, ndërkohë që edhe ndjesia mbi ekonominë ka qëndruar e lartë në nisje të këtij viti.   Sipas zyrës së Statistikave të Bashkimit Europian, Eurostat,  Produkti i Brendshëm Bruto në 19 vendet e Eurozonës është rritur me 0.6% me bazë tremujore në fund të 2017-ës, si ç’pritej gjerësisht nga ekonomistët.

Me bazë vjetore për tremujorin e katërt, ka patur rritje me 2.7%, ndërsa për vitin e plotë 2017,   Produkti i Brendshëm Bruto i Eurozonës është rritur me 2.5%, që është norma më e lartë që prej 2007-ës.  Eurostat rishikoi gjithashtu në rritje normën për tremujorin e tretë, në 0.7% nga i dyti dhe 2.8% me bazë vjetore.  Paralelisht, sipas të dhënave të Komisionit Europian, treguesi mbi ndjesinë ekonomike është ngadalësuar lehtë gjatë Janarit në 114.7 pikë, megjithatë, mbetet në nivel rekord të lartë.

Kjo erdhi prej rënies së lehtë të ndjesisë në sektorin tregtar me pakicë, ku humori u përkeqësua.  Megjithatë, optimizmi për industrinë u rrit në Janar, duke treguar se tendenca pozitive e vitit 2017 po vazhdon.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.