Ekonomia e Eurozonës në vrull – Sondazhet drejt sektorit privat tregojnë për një rritje me 0.7%
Ekonomia e Eurozonës pritet të jetë rritur me normën më të shpejtë në më shumë se 2 vite për tremujorin e tretë, pas një kthese të papritur në muajin Shtator.
Kompania e shërbimeve financiare, Markit, tregoi në indeksin e sektorit privat, që formohet nëpërmjet sondazheve, se aktiviteti është rritur në një nivel të lartë 4-mujorë, në 56.7 pikë.
Treguesit mbi shërbimet dhe manifakturën treguan një fuqizim të dy. Sipas analistëve, ekonomia ka treguar një “shpërthim” të aktivitetit në muajin Shtator dhe sondazhet e tyre sinjalizojnë një rritje prej 0.7% në tremujorin e tretë.
Historiku i projeksioneve të Markit, duke u bazuar në sondazhet drejt firmave, ka rezultuar i saktë. Kjo është norma më e lartë e rritjes që prej fillimit të 2015-ës.
Disa kompani kanë shtuar shqetësimet mbi fuqizimin e euros, megjithatë Markit bëri të ditur se valuta deri më tani ka patur një ndikim modest në eksporte. Indeksi PMI i bazuar në sondazhet, ka treguar përmirësime për Gjermaninë dhe Francën këtë muaj, duke prekur nivelin më të lartë në 6 vite.
Banka Qendrore Europiane rriti projeksionet këtë muaj për ekonominë e Eurozonës, në 2.2%. Mario Draghi tha se zgjerimi i ekonomisë vazhdon të jetë i qëndrueshëm dhe i shpërndarë gjerësisht nëpër shtete dhe sektorë.
Politikëbërësit e institucionit me seli në Frankfurt kanë nisur debatin mbi mënyrën e ngadalësimit të blerjes së letrave me vlerë që kanë përdorur për të nxitur ekonominë në vitet e fundit.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.