Ekonomia e SHBA, “fshin” 5 vite të rritjes. Tkurret me 32.9%, performanca më e keqe që prej Depresionit të Madh

Ekonomia e Shteteve të Bashkuara pësoi goditjen më të madhe që prej Depresionit të Madh në tremujorin e dytë, ndërkohë që pandemia e koronavirusit ka “rrëzuar” shpenzimet konsumatore dhe të bizneseve  dhe rimëkëmbja po kërcënohet nga rritja e rasteve të reja.  Pjesa më e madhe e tkurrjes ka ndodhur në muajin Prill, ku aktiviteti thuajse ndaloi në të gjithë vendin, për shkak të mbylljes së restoranteve,bareve dhe fabrikave, për të ndaluar përhapjen e koronavirusit.

Më shumë se 5 vite të rritjes ekonomike janë fshirë prej pandemisë. Ndërkohë që rimëkëmbja po duket e largët, presionet janë shtuar tek Shtëpia e Bardhë dhe Kongresi që të bien në dakordësi për një paketë të dytë të stimujve. Presidenti Donald Trump, që po humbet mbështetje ndaj sfiduesit demorkat Joe Biden në sondazhe,  tha se nuk është në nxitim për paketën.  Trump ngriti mundësinë e shtyrjes së zgjedhjeve presidenciale të 3 Nëntorit.  Produkti i Brendshëm Bruto kolapsoi me një normë prej 32.9%, që është rënia më e madhe në prodhim që kur qeveria nisi të regjistrojë të dhënat në vitin 1947.  Rënia e PBB ishte më shumë se 3-fishi i rënies më të madhe të të gjitha kohërave prej 10% në tremujorin e dytë 1958.  Ekonomia u tkurr me 5% në tremujorin e parë dhe u “zhyt” në recesion gajtë Shkurtit. Me bazë vjetore, Produkti i Brendshëm Bruto ra me 9.5% në tremujorin e dytë dhe për të gjithë gjysmën e vitit, u tkurr me 10.6%.   Produkti i Brendshëm Bruto ka rënë tashmë në nivelet e tremujorit të katërt 2014.

Klevis Llaha / SCAN 

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.