Ekonomia franceze rimëkëmbet fuqishëm. Rritet me 18.2% në T3. Rrezikon rënie të dyfishtë prej karantinës së dytë
Ekonomia franceze është rimëkëmbur në tremujorin e tretë, ndërkohë që përfitoi nga zbutjet e masave të karantinës në periudhën e Verës. Megjithatë, vëmendja qëndron tek tremujori i katërt i vitit, pasi 2 ekonomitë më të mëdha në Europë, lajmëruan karantina të reja kombëtare. Produkti i Brendshëm Bruto në Francë u rrit me 18.2% në periudhën Korrik-Shtator, sipas të dhënave paraprake të zyrës së Statistikave në vend. Ekonomia franceze u tkurr me 13.7% në tremujorin e dytë, që përfshinte muajin e parë të plotë të karantinës kombëtare. Analistët thonë se rritja gjigante e Produktit të Brendshëm Bruto në tremujorin e tretë, nuk duhet të rehatojë politikanet dhe familjet franceze, pasi tashmë po përballen me një karantinë të dytë kombëtare.
Pavarësisht përmirësimeve në periudhën e Verës, prodhimi ekonomik qëndron ende shumë poshtë nivelit që ishte përpara pandemisë së Covid-19. Me bazë vjetore, treguesi ra me 4.3% në tremujorin e tretë. Presidenti francez, Emmanuel Macron, lajmëroi këtë javë një karantinë të dytë kombëtare që nisi ditën e Premte, për shkak të rritjes së shpejtë të numrit të të infektuarve me Covid-19.
Kjo nënkupton se baret, restorantet dhe dyqanet jo të rëndësishme, do mbyllen përsëri. Megjithatë, shkollat dhe fabrikat do të qëndrojnë të hapura. Analistët thonë se duhet pritur një rënie e dyfishtë ekonomike prej masave të reja.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.