Ekonomia gjermane do rritet ndjeshëm / Bundesbank parashikon rikuperimin e terrenit të humbur gjatë pandemisë
Ekonomia gjermane po rikuperon terrenin e humbur gjatë pandemisë së koronavirusit, sipas një raporti të Bundesbank, që është Banka Qendrore e Gjermanisë. Megjithatë, në raportin e fundit mujor, banka nuk përmend përmbytjet që kanë shkatërruar disa zona perëndimore të vendit, ndërsa një raport i veçantë nga ING Groep thotë se impakti i përmbytjeve në ekonominë e Gjermanisë do të jetë shumë i limituar. Kjo për faktin se reshjet e shumta në Rhine-Westphalia veriore, shteti më i populluar i Gjermanisë, dhe në Rhineland-Palatinate, kanë goditur kryesisht biznese të vogla që janë në pronësi të familjeve dhe jo biznese të mëdha. “Ndikimi i përgjithshëm në ekonomi do të jetë i kufizuar, megjithëse efektet në sektorët e shitjeve me pakicë dhe të mikpritjes nuk duhen nënvlerësuar”, deklaron ING. Ironia e hidhur e këtyre lloj fatkeqësive natyrore shpesh është rindërtimi i shtëpive apo i infrastrukturës, që zakonisht kanë një efekt pozitiv në rritjen e Prodhimit të Brendshëm Bruto. Ministri i Financave, Olaf Scholz, ka premtuar një ndihmë emergjente prej të paktën 300 milionë euro për të prekurit nga përmbytjet dhe një program miliarda dollarë për rindërtimin e qyteteve të dëmtuara. Shoqata gjermane e siguruesve shprehet se stuhitë, përmbytjet, reshjet dhe breshëri do të shkaktojnë humbjet më të mëdha që nga viti 2013. Raporti i Bundësbank parashikon se Prodhimi i Brendshëm Bruto do të rritet ndjeshëm në tremujorin e dytë të vitit dhe do të zgjerohet akoma më shpejt në të tretin.
Lidion Kulla – SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.