Ekonomia gjermane në 2019/ Rritet me vetëm 0.6%. Norma më e dobët në 6 vite!
Ekonomia gjermane u rrit me 0.6% në vitin 2019, që është rritja më e dobët që prej vitit 2013 dhe poshtë normës prej 1.5% që u regjistrua në vitin 2018, sipas vlerësimeve fillestare të zyrës Federale të Statistikave. Megjithatë, ky është viti i 10 radhazi i rritjes së ekonomisë gjermane, që është periudha më e gjatë që prej ribashkimit. Zyra e Statistikave bëri të ditur se sufiçiti buxhetor i sektorit publik, përfshirë shtetet federale, bashkitë dhe sistemet e sigurisë sociale, ra në 49.8 miliardë euro, apo në 1.5% të Produktit të Brendshëm Bruto. Në vitin e kaluar, kjo vlerë qëndronte në 62.5 miliardë euro, apo 1.9% të PBB.
Eksportet u rritën me 0.9% gjatë 2019-ës, pas një rritjeje me 2.1% në vitin 2018, ndërsa importet u rritën me 1.9%, nga 3.6% në vitin e mëparshëm. Kjo nënkupton se tregtia neto dha një ndikim negativ tek ekonomia në vitin 2019. Prodhuesit gjermanë, që varen nga eksportet, janë përballur me kërkesë të dobët jashtë vendit si pasojë e ngadalësimit ekonomik botëror dhe, luftës tregtare dhe Brexit. Sektori i makinave ka hasur gjithashtu vështirësi në tranzicionin drejt makinave elektrike.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.