Ekonomia gjermane në vrull – Të ardhurat nga taksat rriten ndjeshëm, T1 pritet i fortë

Ekonomia gjermane ka gjasa të rifitojë vrull në tremujorin e parë të këtij viti, duke rritur sipër projeksioneve të ardhurat nga taksat, deklaron Ministria e Financave.  “Ekonomia gjermane vazhdon në ritëm pozitiv”, thekson Ministria në raportin mujor, duke shtuar se të dhënat e fundit mbi prodhimin, porositë industriale dhe punësimin, tregojnë për një përshpejtim të aktivitetit në tre muajt e parë të këtij vit.

Megjithatë, Ministria paralajmëroi se perspektiva për rritjen mbetet e paqartë prej pasigurive politike përfshirë; kërcënimet nga politikat në SHBA, rezultatet e zgjedhjeve në Europë dhe kursin e negociatave të Brexit. “Këto rreziqe do të influencojnë tregtinë botërore si dhe aktivitetin global të investimeve”, nënvizon Ministria.

Për 2016-ën, ekonomia gjermane u rrit me 1.9%, norma më e fortë në 5 vite, nxitur nga konsumi i fortë privat, shpenzimet shtetërore dhe sektori i ndërtimit. Në periudhën Tetor-Dhjetor 2016, ekonomia u zgjerua me 0.4% dhe ekonomistët presin një performancë të fortë në fillimin e 2017-ës. Kjo tendencë po rrit të ardhurat nga taksat, pasi më shumë njerëz i shtohen tregut të punës dhe kapaciteti i kompanive për të rritur fitimet po rritet.

Nga Janari në Mars, të ardhurat nga taksat në Qeverinë Federale dhe 16 shtetet rajonalë, u rritën me 6.8% nga e njëjta periudhë një vit më parë, deklaron Ministria e Financave. Kjo shifër është më shumë se dyfishi i projeksioneve për të gjithë vitin.

Të ardhurat e mëdha nga taksat kanë bërë të mundur që Qeveria të rrisë shpenzimet në rrugë, strehim dhe integrimin e refugjatëve, pa pasur nevojë për të emetuar borxh të ri.  Të dhënat pozitive sugjerojnë se ministri i Financave Wolfgang Schaeuble mund ti qëndrojë planit të tij për një buxhet të balancuar deri në zgjedhjet e Shtatorit.

Klevis Llaha/SCAN 

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.