Ekonomia gjermane tkurret me 1.8% / Rriten kursimet e familjeve, ndërkohë që karantina godet konsumin

Ekonomia gjermane është tkurrur më shumë se ç’pritej në tremujorin e parë, ndërkohë që masat e karantinës së koronavirusit kanë bërë që familjet të kursejnë më shumë para se kurrë.  Ekonomia më e madhe e Evropës u tkurr me 1.8% me bazë tremujore dhe me 3.1% nga e njëjta periudhë një vit më parë, sipas zyrës Federale të Statistikave.  Treguesi ishte shumë më i dobët se mesatarja e Eurozonës dhe poshtë projeksioneve të analistëve.   Të ardhurat e disponueshme të familjeve gjermane u rritën lehtë ndërkohë që qeveria ka injektuar miliarda euro në skema të mbrojtjes së punësimit dhe transferta në cash si përfitime shtesë për fëmijët. Megjithatë, masat e karantinës të koronavirusit e kanë bërë më të vështirë për konsumatorët që t’i shpenzojnë këto para.  Shpenzimet e ekonomive familjare ranë me 5.4% gjatë tremujorit, ndërkohë që norma e kursimeve u rrit në një nivel rekord të lartë prej 23.2%.  Investimet e kompanive në makineri dhe pajisje ranë lehtë,  ndërsa aktiviteti i ndërtimit është rritur. Eksportet u rritën me 1.8% gjatë tremujorit, nxitur nga kërkesa e fortë në SHBA dhe Kinë. Importet u rritën me 3.8%, duke bërë që tregtia neto në total të bjerë.  Të dhënat tremujore të PBB krahasohen me një mesatare të Eurozonës prej -0.6% dhe një rritje me 0.4% në Francë, ndërkohë që ekonomia e SHBA, që ka patur progres të shpejtë me vaksinimin, është rritur me 1.6%.

Klevis Llaha – SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.